男仔的精油 - 岩蘭草

上星期四終於學完所有精油啦…( 雖則我因正經同唔正經事而勁走堂其實有好幾隻精油都冇聽到... )

對岩蘭草這一隻根部精油印象好深刻!
因為…Miss 好特別地講岩蘭草好適合男仔，尤其是係家庭支柱的男仔用。

平時上堂，聽 miss 講小朋友、老人家、孕婦啱用咩精油就講得多，又好似真係冇乜講男仔啱用咩油喎!

原來根部油 (仲有薑都係) 可以幫助 release 來自責任的壓力，除了男士們，真的好適合日日為工作為家庭奔波的香港人…

而且可以調節黃體激素，對更年期都有幫助…

肥仔老公近來真的好辛苦，日以繼夜地工作，而我亦在盤算 2013 年的新動向…一方面每天要過著坐監般的 office 生活，一方面又要抽時間兼顧返學同三頭住家，都咪話唔大壓力架!

見到老公三更半夜先放工，由以前從來唔識嗌凍到近來同我講佢唔夠厚褸，真係好驚佢遲早涯病呀!

好，今晚就用岩蘭草 + 薰衣草…

瞓返覺好迎接 2013。

Happy New Year!

點解會生倒刺和指甲生白點?

近這幾個星期開始一星期返兩日學，原來真係好好好好攰呀!

幾年前讀 part time degree 一星期返三日學，回家要做功課，星期六日仲要抽時間拍拖，都面不改容。
但依家呢，只係返兩日，又唔駛做功課，但日日都好似好攰咁，真係唔認老都唔得呀!

不過，每次放學都好開心的，因為吸收了好多新知識。

等我得閒就講啲同大家分享吓啦!

新 take 了營養証書，我先發現原來自己對營養都幾有興趣喎!

大家知道點解會生倒刺和指甲上有白點嗎?

原來是因為缺乏蛋白質和腸道消化不良。

要多食豆類和堅果類的食物。

唔怪得啦…我對豆類有腸胃敏感所以好少食，而堅果類我又不太喜歡食，我應該九成係唔夠蛋白質啦…而且我的腸胃一直都唔係太好，怪唔得由小至大指甲都有白點啦…

新一年，真係要俾心機啲食得健康養好身體呀!

八達通自動增值

慳家精又發功啦!

之前 citibank 激得我嬲嬲哋，用了幾年的八達通信用咭俾我 cut 咗…之後 citibank 又撩返我，rebate 了一百元給我，請我用多兩個月，我見當時又沒什麼八達通自動增值的優惠，就好無骨氣地開返張咭用住先…

終於俾我等到啦…

click 嚟睇吓詳情
http://www.octopus.com.hk/latest-promotions/aavsDec12/tc/index.html

先打電話去八達通度登記，自動增值完成後就可以得到閱卡機啦…如果選擇 $500 增值額仲可以得到 $100 超市 coupon

之後就去睇吓邊張信用咭再有優惠啦…
http://www.octopus.com.hk/easy-reloading/top-up-with-aavs/apply-for-aavs/tc/index.html

發現渣打有成 $150 現金回贈喎! 好啦…我就用渣打信用咭申請每次增值 $500…

不過要拎盡 $150 渣打的現金回贈真係好難，成功申請後只有 $50 回贈，之後要有兩個月的增值額達 $1800 先可以拎多 $100 回贈…
就當只拎到 $50 回贈 ，連同八達通公司送的 $100 超市 coupon，加 $150 「人工」都唔錯呀! 

CINEMA SECRETS VS BOBBI BROWN VS OCTARD 遮暇膏 大比試

偷懶多時，是時間寫一篇試色文了，對，這次又是說遮暇膏。

話說，CANMAKE最近被打入冷宮，是關最近眼圈又再向黑色進發，用開的顏色已經不能好好遮蓋眼圈＝。＝

現在CS/BOBBI/OCTARD是我化妝主要用的遮暇用品，大家對OCTARD可能比較陌生 ，這個是很多台灣的化妝師也會用的遮暇膏，日本製造，香港沒太多地方有售。不多說，先來個感覺比較。

CINEMA SECRETS		BOBBI BROWN		OCTARD
遮暇度:	*****	遮暇度:	****	遮暇度:	*****
濕潤度:	**	濕潤度:	****	濕潤度:	***
顏色選擇:	單色超過30色及5色盤	顏色選擇:	單色超過20色	顏色選擇:	4色

 

看到上圖的BOBBI有多濕潤嗎? 濕潤度同遮暇度是成正比的，如果比較濕潤比較好推的遮暇，遮暇度會較差，因為太大力便會推開晒需要遮暇的地方，要佩合好的手法才可以提高遮暇度。相反濕潤度較差的，雖然比較難推，但不會一推推開晒需要做遮暇的地方，感覺會比較高遮暇度。

另外，如果遮暗瘡/暗瘡印等非眼圈地方時，雖然BOBBI的遮暇度高，但是因為質地較水潤，容易造成遮完好似無遮的後果，原因同樣是太易推開已至未上碎粉已經令原有的遮暇推走，所以一般於面上的遮暇用回比較乾爽的遮暇用品會較好。

總結結果：CS的用於眼底會比較乾，用於面上遮暇會較好，BOBBI則相反，不過CS其實是專業舞台用的化妝產品，所以會比較厚身及乾也是正常的，BOBBI是針對我們這些一般生活上使用的人士，所以會比較濕潤，減少乾紋出現，嚇親街坊XD

BOBBI我會用於眼底近眼珠位，因為較濕潤及BOBBI所提供的顏色比較多及較合適我這類深眼圈的人士用。

而OCTARD我也會用於眼底，不過多不會用於近眼珠的位置，因為愈近眼珠眼紋愈明顯，而且多數深眼圈的也是近眼珠位置會比較深，所以用的顏色也有所不同，OCTARD只有4色，選擇不多，提供的也只是膚色系的遮暇，但是一般使用是OK的!而且於眼位使用，其實我是會加少許眼霜一起用的。最重要是夠平宜！！只是HKD70!對比起CS/BOBBI價錢已經勝了一仗啦~~~

下一篇會有我的遮暇示範，請密切留意^^

EASY 123 Dining & Cooking Studio

啱啱去完旅行叉叉電，係時候收拾返心情，迎接嚟緊應該會好忙的日子... ( 其實香港人有幾時唔忙呢吓? )

早在十一月尾，幸得甜魔媽媽的邀請，可以一齊去 EASY 123 Dining & Cooking Studio 上「IC電磁爐 ∙ 飯 ∙ 堂」的試煮班，玩咗幾個鐘，學煮咗兩樣餸…

當日落勁大雨而且我有腳傷，又咪咪摩摩遲了出門口，好在地點夠方便，唔駛半個鐘就到啦…好在只係遲咗三個字。
但…最遲係我囉…其他朋友仔都好準時冇人遲到o既…

拿拿聲坐低著好圍裙，師傅已經開始咗啦! 何寶龍師傅來頭唔細架…係鴻星海鮮酒家灣仔店的廚部主管…仲拎過好多廚藝獎呢!

何師傅今日會 guide 住我哋煮兩個餸 : 南乳粗齋和上海炒年糕，仲會示範富貴撈起大蝦添…

先來南乳粗齋，材料有 :

師傅教路，先落小小油，再落南乳+水，已經出過水的材料先落，比較易熟的材料, 如西蘭花就最尾先落，炆好哂先落味，如果唔係就會太鹹啦!

大約炆6-10分鐘就可以搞掂上碟架啦…仲有得試食添…好味呀!

試食完就返埋位自己試煮啦…今次係二人一爐…材料已經好整齊地準備好哂等我哋用!

嘻嘻…係咪似模似樣呢? 味道都唔錯架! 而且我哋落多咗南乳，好惹味呢! 不過就要小心落多小小水會穩陣啲!

老實講，屋企一向都有電磁爐，但只限於用來打邊爐，從來都冇用過來煮餸…
對於我依啲唔入得廚房既師奶仔來講，用電磁爐其實安全好多呢! 而且煮出來的食物，同明火冇乜分別呢!

煮完，去下一個餸既示範 - 上海炒年糕

材料如下 :

師傅教路，要先用熱水煮至年糕透明，想軟啲就煮耐啲。年糕熟會變軟，要用熱水浸住備用，就唔會痴埋同變硬。

年糕拎起後，先落油用大火燒熱，再細火炒其他材料。用易潔穫唔洗用太多油，比較健康喎! 因為椰菜會有水份，可以見痴底先落水。

依個餸所需時間就要多小小…大家都急不及待試食啦…

我哋比較喜歡比較軟身的年糕，於是就煮耐小小…

炒呀炒…師傅都讚ok架…

依兩個餸就成為當晚的晚餐啦…不過就真係煮起即食比較好味…

之後就有師傅示範的富貴撈起大蝦

我見到中間啲大蝦已經流口水啦…好靚呀!

之後就將其他材料圍邊…

之後就撈得啦…一路撈一路加汁…

撈到周圍都係.. 先至好意頭架!

試煮試食完，仲有輕食請我哋食喎!

我哋同 openrice staff 一齊 share 三款…三款都ok喎! 熱騰騰好好味啊…

鮮肉鍋貼勁爆汁　

生煎包


小籠包


玩完食完就散 band 啦…我留低咗一陣，欣賞吓場內的佈置…

好鐘意依一幅貼滿相片既鏡牆呀!

示範區，好企理

臨走前發現原來仲有其他嘢賣…

提醒大家好快又到聖誕節啦…啲造型甜品好靚呀!

過咗一個好開心的下午，多謝甜魔媽媽的邀請呢!
原來我哋兩個無飯師奶都煮得到好味餸架…唔好睇少自己啊!

DIY 精油香水

經過幾日來不停咁 search，終於有把握整依個 roll on Perfume 啦…

事緣係之前行街見到 GP 出的油性香水，可以自己將唔同味的油溝來溝去，變成自己獨一無二的香水，真的好吸引，但價錢都幾貴呢! 一問之下，原來 GP 的香水是用荷荷巴油 + 香精溝來的。

相比坊間的香水，其實已經天然好多。但…一聽到係香精就的確有小小失望啦…如果佢係用香薰油就真係覺得一啲都唔貴啦…
因為用 roll on (走珠) 就只係需要「碌」在脈搏位、耳背等等位置，比噴更加襟用! 因為噴就大半係噴咗喺空氣度呢!

於是就周圍搵 roll on，終於俾我搵到返嚟於是就一口氣買咗好多支返嚟…


在動手前就要認識一下香水的特性啦…

主要係分清楚前味、中味、同後味

前味 Top Note ( 最快揮發亦是最先聞到 ) - 甜橙、西柚、佛手柑、薄荷
中味 Middle Note ( 前味之後半小時出現 ) -
薰衣草、天竺葵玫瑰、迷迭香
後味 Base Note ( 揮發得最慢 ) - 檀香、依蘭、廣藿香

第一次，我就選了佛手柑(前味)、天竺葵玫瑰(中味)、檀香(後味)，比例係 3:2:1，要先落後味=>中味=>前味，如果唔係就後味就會 cover 哂前味架啦…

落完精油再加埋杏仁油，唔駛三分鐘就完成啦…



用個靚靚禮物袋入住，做聖誕禮物無失禮呀!


大家都一齊嚟試整啦…

尿道炎, 陰道炎救星 - 佛手柑

真係唔怕醜地話你知，我不時都會有尿道炎的…

記得第一次病發時好突然的，我一個人在家上洗手間的時候突然覺得好痛，而且還在小便中還有粉紅色的血呢!

其實我都估到應該係尿道炎的呢，第二日hea睇公司醫生食足五日抗生素，但好快又翻發，其實我自己都知自己應該未斷哂尾，但再正經地去睇醫生，醫生都話唯一的解決方法是多飲水和做一次認真的尿液測試

之但係我自問已經飲好多水，但我都唔知自己腎功能太好定太差，我可以一整個上午都不用去一次洗手間的呢！而且醫生提醒我要儲夠一定尿量，才能夠足以沖走尿道的細菌，所以要不停地飲水令自己可以製造多點尿液製造沖力

而我如果感覺到好似想「瀨嘢」的時候就會立刻啪兩粒紅莓素，好似真係有啲用呢！

這個病真的好麻煩，試過一次好似就會跟足你一世咁…

在香薰治療師課程的第一堂，miss 就教了如何用佛手柑精油來對付尿道炎 / 陰道炎。同大家分享一下…

複方 ( Synergy ) : Bergamot 佛手柑 5d + tea tree 茶樹 4d + Sandalwood 檀香 2d

方法1
用10ml全脂奶 + 2d Synergy 浸浴

方法2
用10ml / 20ml(敏感肌) 底油 + 1d Synergy 加落衛生巾

方法3
用10ml 底油 + 6d Synergy 按摩腳底，加強免疫系統

方法4
製作浸劑 - 11d Synergy + 22d 精油乳化劑，用2-3d 浸劑落水浸浴

原來一種配方都有 4 種使用方法喎! 我自己就覺得方法 4 係最方便啦…

素顏范范

超喜歡范范... 一個好有氣質的女星…身為一個基督徒，她那給人與世無爭的感覺，真的好 charm 啊!!

連我結婚時成長片段的背景歌，都係佢結婚時的<<最重要的決定>>

她和黑人兩公婆好 sweet 好有情趣，真令人羨慕啊!

早前黑人在 facebook 專頁 post 了范范的素顏，哇…靚到呢!!! 跟在舞台上的樣子沒大分別啊!

好相信，相由心生的。

我要向范范學習呀!

仲要，多親近神…

p.s 右腳跌打後的併發症皮膚發炎惡化了，右腳長了大大小小的水泡，超恐怖! 去醫生度拮穿完隔一陣又起返，心情跌到落谷底!
連瞓覺都要就住，怕會弄穿水泡，所以連瞓都瞓得唔好，教我如何是好?!

正blog 推介 : HERBS AND OIL WORLD

近來好鐘意睇外國人寫的 Herbs DIY blog ，真的好佩服外國人的 DIY 頭腦呢!

其中 HERBS AND OIL WORLD 是我比較喜歡看的..

http://www.herbsandoilsworld.com/

這個網主要是搜羅其他BLOG的好文章，所以亦都可以從而找到好多正BLOG

差唔多要準備聖誕禮物啦…努力的刨攞多啲 idea 先!

iherb.com Free International Shipping

我真的成為 iherb.com 的 super fans了，買什麼健康食品或者外國食品前都會上去 search 一下！

連帶身邊既朋友仔都愛上咗 iherb.com 呀！

其實 iherb.com 早在十月份就推出咗 order over usd40 就免 international shipping…而且International Airmail 改為 Global Mail by DHL, 即 DHL 去 warehouse 度 pick up，再送去 個別國家的 postal service for final delivery..

時間會快咗，定慢咗，我未試呢… 我想等有九折時先試啊!

官方網頁就寫 8 個工作天就可以送到香港，實在係快呢!

雖然 over USD40 的 order, International Airmail 都只不過係 USD4，但有得連 USD4 都慳埋又的確更抵喎! 如果買到 over USD60 還可以有多個九五折呢!

但注意, Global Mail by DHL 只適用於 order below USD80, 重量少於 4 磅!

http://www.iherb.com?rcode=tuj677

(我的 gift code 係 TUJ677 啊! ) 

Maybelline master liner

哈, 我撈又過界啦…今次又係講眼線筆!

事源係上星期六見到10號萬寧會員全場九五折…就中咗入去逛一下…

就在當日下午看到了 Maybelline master liner 幾好用，於是就拎上手試吓!

咦，真係好易搽咁喎! 跟我上一次講的 Solone 防水眼線膠筆有點似…

而且，現在特價 $45，買兩件紫點仲要七五折…折實只係 $32…激抵!!

但激抵的代價就係買多了一支原價 $99, 折實 $70 的 Mascara，你話女人錢幾易賺呢!

其實我試過搽上次果支眼線筆返工，未到中午已經變熊貓眼，眼底黑哂啦… 大 C 話因為我沒有搽碎粉囉。
但我自己覺得又冇上粉底，只係搽防曬同遮了黑眼圈，要上碎粉咁大陣仗?

其實我真係要習慣吓上碎粉呀! 因為上了碎粉遮暇都會 keep 得耐啲!

好啦…當日我搽了 bb cream 出街，其實塊面是有小小油的! 未洗面之前我先試畫一下眼線，再過一陣見真係有啲溶，同埋眼底有點黑。於是我就洗完面再畫一次，又係過一陣再照鏡，溶的情況反而少咗添喎!! 因為眼蓋咩都冇搽比較清爽嘛!

下次我會乖乖哋上好碎粉再試…
不過，我覺得支"芯"好易斷啊! 只用了兩次已經斷咗一小截啦! 不過，斷咗反而更好畫.. :p

我的第一次 - 做熱製 cream ( 定 lotion 呢? )

經同學仔推介，我終於的起心肝去學熱製 cream…

第一 cream，我預咗失敗，所以用了最簡單最便宜的材料去做，連花水都冇落呀!!

今次做了大約100ml..
材料有 :

油相
乳化蠟 10g
甜杏仁油 15g

水相
水 60g
甘油 10g

將油相 &amp; 水相材料分別放入兩個容器內，再一齊隔水加熱..

其實我都係本著大無謂精神，乳化蠟溶哂就拎起啦…之後就將油相倒入水相，係咁攪係咁攪!

攪咗半小時，其實都只是杰咗少少…一度懷疑係咪失敗呢?

但我又趕住出街食飯喎! 就只好擺低啦…

幾個鐘之後回來，就發現變得杰杰哋似似哋樣啦!

其實本來我想整面霜的呢! 但好似有點稀…
將錯就錯，放落一個 hand cream 樽裡面啦… 不過我都照用來搽面…heehee!

第二朝用好似又杰咗啲呢! 我帶了回公司給同事試試質感，個個都話唔算好稀，好多搽面的 lotion 都是差唔多的…而且覺得幾潤添…但亦有同事話搽果一刻好潤，但好似就乾。我自己就覺得搽完好似有一層蠟喺皮膚上面…洗完手/面都仲好滑，都幾鐘意個質地!

經同學仔再指點，下次試吓落埋乳木果油(脂)，就會再潤啲同杰身啲!

希望快啲用完依100ml lotion 啦!