How to save an hour everyday 每天多出一小時

死亡六月仲未過呀! 不過見到盡頭啦，涯多一星期就重獲新生啦.... ( 哇…講到咁嚴重... )

之前講過，真係要認真地學習吓 time management 呀! 依一項，真係我的最大的弱項。

於是呢，我就在 amazon 訂了幾本講 time management、講人生整理的書，我要改變自己呀!!

雖然仍然處於水深火熱之中，但星期五測完驗就急不及待要讓自己先放低一下…平衡一下緊張的心情，再為下星期四的另一個測驗努力!

我選擇了開始這一本 : How to save an hour everyday 超級時間整理術 -- 每天多出一小時

我習慣每拿起一本書，都會先看目錄。
一打開目錄已經覺得本書好有興趣啦…

第二章、第五章都是我最大最大的致命傷呀!

花了大約一日就已經把書看好了，真開心! 真係好少書可以一氣呵成地看完…

等我同大家分享一下吧

1. 諗一諗，如果每日可以多出一個鐘頭，那，你會做哪三件事呢?
我會將多出的那一個鐘頭，把屋企佈置好收拾整齊、看自己喜歡的書、去做運動

這三件事，都是我好想去做，但一直都因為沒有時間而忽略的事，現在有動力去為自己加油向「每日多出一小時」進發了!!

2. 來一次大掃除
無論係家裡、公司都要來一次大掃除。都唔怕羞地話你知，我家依家似足癈墟呀! 我這個購物狂今季買了不少衣服，但又一直都未有時間換季，所以新衣服都未有容身之所，但舊衣服卻仍然佔據衣櫃大部分的空間喎!  等我下星期過完死亡六月，我要來個衣櫃大掃除呀!
把沒有用的狠狠地扔走，以後就執屋的時間可以大大減少、而在癈墟中找東西的時間都可以慳埋!

3. 每日為自己寫低明天要做的五項最重要事情

記得，只可以寫五項最重要的事喎! 我覺得應該會好有用呀! 每日要做的事很多，但如果只可以寫五項，咁一定最重要的啦。
如果寫得太多，一日點做得哂? 每日都keep住沮喪的心情，邊會開心地繼續去做個列表出來呢?
其實我自己都有寫 to do list 的習慣，但我只係會知道我有什麼未做，但又睇見仲有咁多點會做得完? 最後都係 last minutes 先完成得了，其實個 list 係冇乜用的! to do list 真係貴精不貴多呀!! 而且每日只有 5 個 quota ，手板眼見功夫就拿拿聲做咗先，唔好浪費咗個 quota 去做原來只需要兩三分鐘就可以完成的工作嘛!

4. 三個做好標記的文件檔 : 行動、歸檔、留存

我覺得在家在公司我都要做這三個 folder 呀!

其實我依家我在公司就只有兩個 folder : done 同 pending，諗諗吓又真係有啲問題喎! 既然係 done，仲 keep 來做乜? 扔咗去枱面又少了一件東西啦…而個 pending file 就長期都滿滿的，每次都要分邊啲要即時做、邊啲係要等齊料先做到。明天回到公司就將 file 的 label 改一改啦!

而屋企那三個 file，我都真係要認真地建立呀! 因為我成日都唔忘記交乜費乜費…

5.  將一個的三十日分成自我日、關鍵日、事務日

我覺得依個好有意義呀! 在一整個月入面每日都好似會過得好充實咁呢! 有時返工真係返到好似失去自我咁呀!

自我日，要給自己補充能量、對自己好啲，可以用來享受生活、去做運動、去見想見的朋友。而死都唔會去溫書架啦…哈哈哈!
關鍵日，要把自己的工作集中在五個最關鍵的最重要的活動上，其他嘢就唔做住架啦。
事務日，要處理其他事務，平時沒有時間做的事，可以用來做 planning

6. 定時查看 email

我有超級嚴重的職業病，無論是公司email 或者係 personal email，我都會一得閒就去 check 住來追 email … 其實得閒就去 check email 依個習慣真係好影響工作效率，因為好多時走去處理 email 後，本來在做的事就放埋一邊，好易又爛尾了!

personal email 已經整理好啦! 在 inbox 沒有分類的 email 已經全部放入了一個備用 folder，從明天開始就把電郵分類成 "立刻行動"、"值得一睇"、和"可能有用" 啦! 而這三個類別都不如的，就 delete 啦! 集中精力在"立刻行動"的分類裡面，"值得一睇" 的分類就一星期清理一次，"可能有用" 就有多餘時間先睇吧!

7. 獎勵自己

好似我依啲有職業病無時無刻要追 email 的人，原來讓自己去 check email 都可以當成一個獎勵。當自己乖乖完成一個 report 先獎自己去 check 一轉 email，又或者如果你好鐘意飲咖啡，當自己完成了一項任務就獎自己去飲杯咖啡，我覺得都幾有趣喎!


來緊的一個星期係 warm up，過完死亡六月，七月要認認真真去實行「save an hour everyday」