我愛 Zalora

自從做了媽媽後…其實買極都是BB衫BB用品,

買俾自己的真的愈來愈少。

事關呢…現在的身型不似以前著咩都好睇…日日都趕頭趕命出門口…真的是是但但有件衫著就出門口了。

但… Zalora 的出現…真的令我瘋狂!!

因為…她的免費退貨服務。

見到喜歡的…唔駛諗啱唔啱身…著起靚唔靚了…

先買回來…試著完過唔到關就退囉…就係咁簡單。

退貨呢…仲要係用順豐到付去退…叫順豐上門收件又得…拎落順豐站又得…方便到呢。

詳情參考 這裡

下星期公司 annual dinner 要 formal dressing…好在 zalora 都不少選擇! 於是我就買了兩件比較闊身的回來「試身」…但媽媽級朋友話, 其實修身的看似更瘦…

過幾日見到幾條又買…

而最近發現自己好少帶飾物, 又在 Zalora 買了幾條好抵的頸鍊襯衫。

收到後已經急不及待要試…多了頸鍊的自己成個look果然係冇咁hea喎!

我落單時…是用了 DBS 的 75 折 promotion code…自覺勁抵啦…但優惠做到 11/30 就完了。

正當我打算收手隔一陣等新 promotion 的時間…給我看到 HSBC 做的優惠更加魔鬼喎, 係七折呀!!

有意跟我一齊買 zalora 的朋友仔…在12/1/2015 - 12/15/2015 輸入 promotion code 「HSBC30」就有七折啦!

而 12/16/2015 - 1/31/2016 輸入「HSBC28DJ」都有72折…

特價貨都有得折架!

​

而每星期四用 master card 結賬都會有 93折…因為不用入code…所以可以跟 HSBC 的優惠一齊用…所以呢…星期四入手係最最最化算的呀!!

​

蒸洋蔥…增強免疫力、治感冒

近來轉天氣…大人小朋友都好易病呢!

年妹去完旅行回來都不停流鼻水…食完藥都沒有好轉過…

在不同的媽媽谷都不時初起和久久未癒的求救…

止咳就弄個洋蔥水，好多媽媽 ( 包括年婆婆 ) 都話好 work

近來亦有蔥白水止鼻水…不過有待媽媽們親証成效。

每日都在苦惱整咩粥仔的我…見到這個媽媽谷 send 出來的食譜覺得幾好呢…

洋蔥可以殺菌…食吓無妨喎…

洋蔥水放落杯仔飲…蒸過的洋蔥其實一點都不會辣還會有點甜甜的…打成泥加落粥仔真是一個好方法。

可以整定冰磚…在近來的非常時期每日加一小粒去煮粥仔…無聲無息就幫 bb 打定底了…

快樂的習慣

培養快樂的習慣…其實可以好簡單。

你做到多少?

互勉之!

十月的中期 review

十月過了一半啦~ 即管看看…月頭定的目標做到多少?

1.每朝早起床就飲一杯蜜糖+蘋果醋…減肥+幫助排便 ( 進度 : 60% )
2.不准再搭的士返工 ( 進度 : 0% )
3.在家吃早餐 ( 進度 : 0% )
4.每天最少吃一個水果 ( 進度 : 30% )
5.一星期最少敷一次mask  ( 進度 : 50% )

唉…進度太差了…剩下的半個月要急起直追…

十月了

終於都十月，終於都踏入秋天，終於都....開始可以著外套而不會太熱，可以舒服地遮遮肥手臂啦!

不過…減肥的心不能退減的。媽媽不可以放任自己變做肥師奶黃面婆的呢。

早前終於的起心肝，放低產後又闊又大又 hea 的衣服…買過一批返工衫…立刻就有朋友和同事說我瘦了不少。心裡當然暗喜…但回到家上磅…發現只不過輕了 0.x kg…

果然…只是視覺效果…不過…視覺上瘦了也是一件好開始呀。

趁住一個月的新開始…就給自己一些小 target 衝擊一下吧…

我要…

1.每朝早起床就飲一杯蜜糖+蘋果醋…減肥+幫助排便

2.不准再搭的士返工

3.在家吃早餐

4.每天最少吃一個水果

5.一星期最少敷一次mask

就由小習慣開始…重新找回自己吧! 希望大 C 伯娘都可以開心地重新出發…

大家又有沒有 targets 呀?

為了妳…媽媽努力執返好自己…

不經不覺… leen leen 就快八個月了…

這八個月當中…其實真的好失去自我…生活裡…只有 leen leen…和工作。

每日呢…行屍走肉咁…回到家餵完奶就真係累到要去睡了…可能就係太夜晚飯又太早去睡…我現在的身型真的慘不忍睹…啱啱生完好似仲瘦過依家。

一向瘦底的我…其實真係幾接受唔到自己現在的身型…但係又的唔起心肝去運動…為咗多奶依然係咁食係咁食…

九月終於到了…決心要慢慢執返企理自己…

喺 fb 見到依張圖…勁有共鳴…
我要 leen leen 有返個又靚又叻既媽媽呀…

各位媽媽一齊努力做靚媽!

我去 online shopping 先啦…哈哈…

亂七八糟的家

自從 leen leen 出世後…我的生活的確起了很大很大的變化

其實, 不可以全都「歸功」於阿囡…時間管理一向是我的「強項」 我一向都知道但一直都是沒有認真去改善。多了阿囡…工作多咗…時間管理更重要!

慢慢, 我領悟到一啲嘢! 就係…盡量簡約~

我一向都勁鐘意買衫…但係! 著來著去果幾件。衫多的問題其實都不少…換季要執餐死…

我今晚鎖定 10 套衫俾自己先得~

楊張新悅育兒秘招18式分享會

在陀囡時…我同老公都聽了不少育兒講座…但生完囡後…這個實在是第一個呢。

題材真係幾吸引…要學做一個雙職媽媽實在不簡單…從抓狂到自信嗎? 更是遙不可及的事。

 

所以…就算幾忙幾想陪囡…都捉了老公出走四小時去聽一下。不過去到發現原來可以帶BB出席的…早知帶埋阿囡啦…

遲了少少到會場…一坐低就開始了。開場白有講者的開場白…又令我對新悅加了不少分…

我跟她一樣…漸漸已經很少聽到人家叫我趙小姐了…雖然多數人都會叫我的英文名…也很少人叫我做陳太…但每次被人叫陳太我都有一種飄飄然的感覺…我會覺得做了陳生的老婆、leen leen 的媽媽…就要正經一點不要老是低低能能無厘正經啦 。 

新悅講的內容很好…等我節錄比較到肉有共鳴的吧…

我也很欣賞新悅生了大囡…陀住二囡都能完成碩士、發展自己的事業…我們要明白自己不能因為做了媽媽就沒有自己的生活…沒有自己的興趣…就算是 FTM ( Full time mother ) 都要有一個抖氣的窗口。

所以真的好感恩…當初有了 leen leen…身邊的人都叫我唔好再讀書…我依然決定繼續深造我的香薰治療課程…

讀書…是自己的…而且我相信身教…leen leen 由細陪媽媽讀書…大個囡都會鐘意讀書的。

她又提到要優雅地出街…我就真的要好好學了。她帶著三個小朋友都能從容不迫…我只帶著一隻小 leen leen…應該唔難呀哇?!

我回想起…其實每天都沒有什麼精力去打理自己了…有時想打扮一下…但現在吹脹了不少的身型其實要找到一件穿得好看的衣服都有點困難。不如…就學新悅所講…減少自己的選擇吧：眼影不是灰就是啡、衣服不是黑就是白。

在選擇上慳了不少時間…我真係試過因為找不到鞋去襯衫而選擇換衫…結果多花了十分鐘才出門

拿拿聲…把著得不好看的衣服都扔埋一邊…等瘦身成功後就獎自己買過啲衫啦…

此外…提到夫妻關係的 "保護" 都很有得著。

其實自 leen leen 出世後…同老公二人世界的時間少之又少。

在一個家庭裡…如果夫妻關係只是用小朋友來維繫實在是很危險呢。

新悅提到一星期要有一次放下小朋友去拍一次拖…一年去一次旅行…我都覺得應該要學一下…

眼前看到好一個從容不迫的新悅…我團火…又返嚟啦!

 

來做我的 PEOT 同學吧…

有追開 blog 同 faceboook 的朋友仔…都知道我由陀囡前已經開始讀 PEOT…我讀的…是第一屆…現在開到第三屆啦!

PEOT 是 IFA 的延續…更深入和專業地去了解精油的特性和產品製作。

課程真的好吸引! 如果唔係我都唔會返學返到生囡之前果日都仲打算去返學，坐完月出關第一件事就去返學啦…

上課地點在長沙灣廣場, 如果想知多啲可以話我知…我盡量答你。
我答唔到既…幫你返學校問啦。

Be a strong working mom

Working Mom 實在唔係易做，不過我都做咗快三個月了!

老實講，返工後壓力大多了，要照顧小 baby 也要兼顧事業，仲要餵埋人奶，實在係身心疲累的，情緒亦差了不少!

不過天主很照顧我，上班後人奶路算是有點起息，親餵後都不用好似未滿月時要再補奶粉了！漸漸跟 leen leen 一齊的時間都不餵奶粉，直接親餵就足夠了。可惜，都係唔受泵，每天在公司亦不敢花太多時間去泵奶! 實在太邪，每次 office hour 去泵奶返埋位都有人找過我，叫我點安心去呢？

不過，每次同事提到可愛的 leen leen 我都會從心裡笑出來，辛苦暫時忘記

為了 leen leen 我會繼續努力，以身作則兼顧好自己做妻子，媽媽，香薰治療師的職責!

我的母乳路

闊別了一個月…終於都重出江湖啦~

leen leen 已經滿月啦…

leen leen 出世後跟在肚裡一樣…真的好錫媽媽… 

除了在她出世頭兩日可以全人奶之後…日日都要補奶粉呀! 我估…應該是我自己天生乳腺比較幼…乳腺長期都不暢順…而且奶量亦比較少…平時都沒有谷奶或者滴奶的情況喎!

雖則如此…但是我都堅持餵到幾多得幾多…但份量只夠 leen leen 做餐前甜品咋。

連陪月都大讚囡囡好有耐性…因為她真的需要好大力先啜到少少奶奶…而且她黃疸一直都沒有退到100樓下…整個人都會比較累…她好多時都啜到睡著但她仍然好努力啜，而且姑娘都讚她啜得叻叻…媽媽 nipple 沒有太多的「勞損」。

雖然…到現在我的乳腺依然都未通…但好像開始有起息了。由當初給囡囡啜了大半個小時都掃不到風…沒有 vee vee…到現在有時掃多陣就落到格而且有濕片…什至不用補奶粉…

雖然每次見到囡囡用奶樽食奶粉眼仔碌碌的精靈樣…對比啜媽媽奶時的眼瞓樣真的有點無奈…但我依然會堅持呀!

希望繼續努力…三月底返工前可以餵到一半餐數的人奶啦…

準媽媽練力坐姿

之前上了一個孕婦香薰按摩班…MISS 教了一個準媽媽練力坐姿…七個零八個月就可以開始做了。

方法好簡單…就是反轉張椅來坐…椅背加上厚毛巾或者 cushion。

我都試過這樣坐著來用電腦…其實都ok的…不過可能我家的椅比較闊…坐一陣就有點累了。老公就話人哋教係咁樣坐著看電視而不是對電腦…咁樣坐住做嘢唔攰就奇啦

大家都可以得閒就咁樣坐練吓力…坐半個鐘至一個鐘就夠架啦!

坐月必備 - DIY 乾洗頭粉

我真是一個無聊的媽媽…生囡我唔擔心唔緊張呀…反而擔心埋一啲無謂嘢

阿囡會唔會唔夠靚女呀? 啲衫仔夠唔夠靚夠唔夠著呀? 坐月無得洗頭無得日日沖涼咁點算呀? 幾時可以著返以前啲褲呀? 幾時可以染返靚個頭呀?

真係有幾無謂得幾無謂…哈哈…不過好多朋友都話…其實我這個心態都是一件好事…起碼不會太緊張…產後抑鬱的機會可能都會少啲。

其中…無得洗頭係我最最最大的 concern。我終於鑽研到點樣做乾洗頭髮粉啦。

其實坊間都有得賣乾洗粉…但是價錢都唔平呢。趁仲有幾日…測試一下係咪真係 work 先。如果到真係坐月時才試…發現唔太有效但係又洗唔到頭就大件事了。

材料好簡單:

1. 一個碎粉盒 ( 或者用一個平時放胡椒粉的小樽都ok )

2. 粟粉

3. 小梳打粉

4. 精油 ( optional la )

其實我都只係小試牛刀…所以用了1:1的粟粉+小梳打粉溝埋就撥上頭了。

沒有秘技…只係需要一小忽一小忽頭髮分開撥上粉在頭皮上…搞定再撥和梳一下頭髮…覺得不夠鬆或還是覺得有點笠就繼續撥粉上頭皮

放心不會變白髮魔女的。

平時我隔天一定要洗頭。我習慣早上洗頭，其實洗頭後第二天晚上已經開始笠+有頭皮+頭痕。這幾天我在做實驗…涯到今日已經第四日都未有好笠的感覺…而且頭皮都只是一兩粒…和平日之前一天洗過頭的情況差不多。

意外地發現…平時我的頭髮都很貼很塔…用了這個乾洗頭粉反而有點改善…頭頂頭髮冇咁貼呢!

不過我覺得逄鬆的感覺只能維持約幾小時…但好過無啦…頭皮唔笠唔痕已經好好啦…

唔知台灣的逄鬆粉係咪都係咁上下原理的呢?

我覺得這個乾洗頭粉不是只是坐月要用…平時頭髮太塔或是趕不及洗頭都可以用呢…

金盞花浸泡油 - 用咩油好呀?

連續講了幾日孕產婦的恩物…我哋今日又講返之前浸的金盞花浸泡油吧。

曾經我都有疑惑過…金盞花浸泡油應該要曬太陽嗎?

有疑惑就當然問吓老師啦。

老師話其實曬唔曬太陽取決定我們用什麼基底油來浸。

如果用比較便宜的基底油…例如我今次用 olive oil…就可以曬曬太陽了。植物的有效成份先可以落到油到，不過基底油的營養就可能沒保存很那麼好了。大約一個月就可以收成啦!

但如果用比較貴的基底油…如用 jojoba oil…亦想要埋基底油的營養…就可以放在陰涼地方…用較長的時間約兩個月去浸油…植物和基底油中的營養都可以拎得到了。

記得每天都要上下搖晃一下啊…植物有機會會索油…如果見到油沒有全部蓋住植物時就要多添基底油了。

延伸閱讀
金盞花浸泡油

孕產婦恩物#3 - 紅豆水

好好好…繼續嚟孕產婦恩物#3先…

水腫係好大部份準媽媽都會遇到的…其實我自己水腫都不算太嚴重…不過我就好驚如果一直都唔理…本來已經夠大的大腳八腫到一發不可收拾的話…生完會再大一兩個 size 就麻煩了。

所以我一覺得自己有啲腫…就會整紅豆水來去去水腫…

自從發現原來燜燒保暖杯都可以方便地整紅豆水…我就愈來愈勤力飲啦…因為實在太方便了。

不如都同大家 share 一下做法啦…

材料:
紅豆 (其實我好隨意地拎一堆)
茶葉袋 ( 只係方便而已…唔用都得 )
燜燒保暖杯

紅豆浸大約一小時…不過有時懶…只係洗乾淨就入杯架啦…一樣焗到的…

之後放入茶葉袋中…放入燜燒保暖杯中加熱水焗 4 小時就可以了。

係咪好簡單呢?

焗出來的紅豆水是這樣的。

我試過焗得太耐…紅豆水會變得好深色…

而且紅豆都焗到爛了。其實是失敗的。

因為紅豆去水腫的成份在紅豆皮…如果紅豆煲爛了…變相仲會多咗澱粉質呢…

如果沒有燜燒保暖杯…可以煲一煲水…之後放入紅豆…熄火焗三十分鐘…一樣可以做出紅豆水架!

記得呀, 不能煲爛紅豆…不用加糖…只飲水不吃豆才能做到去水腫的功效呢。

而剩了的紅豆…可以放入麵包機整紅豆蓉做甜品或麵包…一樣好好味架!

聽說…紅豆水可以去水腫之外…仲有舒緩便秘的作用。而且紅豆正氣…準媽媽要避免食寒涼的薏仁來去水腫…紅豆水的確係最好選擇呀!

孕產婦恩物#2 - 白蓮鬚

相信好多媽媽都識得白蓮鬚這東西。

我媽咪陀我同細佬時都有飲…媽咪就話係清胎毒的…我跟細佬嬰兒時代又真係皮膚幾好架喎!

不過近年都有好多對白蓮鬚不同的 comments…先有說不乾淨…也有說會令生產時子宮難開…等等…

其實早在懷孕六個月左右…媽咪就已經買定了叫我煲來飲。但我一來懶…二來就是對白蓮鬚沒太大信心。

於是我就去看了中醫…問一下自己的體質適宜飲白蓮鬚嗎? 食乜嘢可以幫助去胎毒。

不過中醫就話…白蓮鬚不是用來清胎毒的…而係幫助「易啲生」。望一望我的下盤…就話我應該冇乜問題了…( 哈哈…盤骨王係名不虛傳架.. )

而且中醫把脈後說我個人一啲都唔熱…而且沒有胎毒就不用刻意去清啦! 反而不適宜食太涼的東西。

而我亦都問過我的香薰老師 Ms Cheng…她有一個兩歲的小女兒而且她也是中醫及草藥學碩士…問佢實冇死啦…其實 Miss 自己都沒有刻意在產前清胎毒…不過她都建議可以在生產前吃西瓜…簡單又安全。

於是…白蓮鬚就俾我放埋咗一邊了，只是飲奶奶得閒烋吓的腐竹雞蛋糖水。

直至上星期一回娘家吃晚飯…媽咪煲了白蓮鬚給我…發現對我幾有用喎。

38週的 leen leen 已經有7 磅 2 安士了…後勁非常之凌厲! 六星期重了兩磅幾三磅。可能因為重得太快了…一下子我的肚子大了很多…覺得墜了很多…而且開始有責住膀胱的痛苦…經常都覺得尿急但其實小便只有很少而已。

神奇地…飲完白蓮鬚第二朝…發現責住膀胱的假尿急情況改善了不少。聽媽咪的朋友講…白蓮鬚都有利尿的功效…可能就是改善了假尿急的原因了。

而亦有陪月姨姨教路…帶住白蓮鬚入院待產都可以幫助易生啲…都一試無妨呀!

我亦有問過其他媽媽…她們對白蓮鬚的反應沒我那麼明顯。可能就係因為其他媽媽都比較穩陣…白蓮鬚始終是比較涼的…飲一碗就收手了。而我第一次飲已經係足哂月 leen leen 可以隨時出世…而且自己又傻吓傻吓天不怕地不怕…一飲就三碗…可能就是這樣…效果就咁明顯了。

都話有媽的孩子像個寶…好在媽咪煲了白蓮鬚給我…舒緩了不少不適…
雖然媽咪工作好忙唔多照顧到我同 leen leen，但你一直的關心已經令我好窩心了 !

順便出賣一下 leen leen…俾大家睇吓佢周身郁既曳曳video... :p

孕產婦恩物#1- raspberry leaf tea

細C仲有唔夠兩星期就生 leen leen 啦。

好多人問我…有冇好緊張?

確實真係唔太緊張喎! 可以話…仲未識驚。

不過除夕當日去醫院做產檢…助產士見我由之前每星期重1kg (!!!!) 突然反輕了一磅…就捉了我去做胎心聲測試 ( 之後再講呀吓… )。而一直都順利 pass 的血糖和尿蛋白測試…尿蛋白又突然 fail ( 又係之後再講呀吓… )…當日夜晚晚飯後又突然肚痛…但又分不清楚是肚痛還是作動初期類似的 m 痛。

突然之間一大我就開始驚驚哋啦…不過 leen leen 已經順利過渡咗 2014 年…成為了 2015 年的大B…幾時出世都無問題了。

講返正題先…有生了小 baby 的朋友仔介紹了 raspberry leaf tea ( 覆盆子葉茶 ) 給我…還分享了極度令人興奮的經驗…子宮頸由 3 度到小 B 出世…只是用了3個小時…而且不需要動用任何的止痛…

我當然好有興趣試啦…不過原來在香港也不是容易買到的…不過好在我在 Piago 一搵就搵到了…而且價錢唔貴喎! $37.9 有 20 包

朋友仔話…產前兩星期每日飲兩包就可以了。

在網上看到…原來 raspberry leaf tea 是在外國很流行的助產飲料…可以強化子宮的肌肉、軟化子宮頸口及使會陰肌肉更有彈性。而見到有其他中國人媽媽都有在生產前飲用 raspberry leaf tea…生產時醫生都話子宮頸好軟好有彈性…

除了在產前飲用之外…其實產後飲用都可以幫助子宮復元和乳汁分泌…

我在盡最後衝刺努力飲啦…生完再同大家講係咪真係有用呀吓。

明天…仲有孕產婦恩物#2 介紹呀!!

參考資料
http://www.livehere.de/etwas_geburt4.htm

2015 - DO ALL THINGS WITH LOVE

2015 年開始啦…Double C + Leen Leen BB 祝各位新年快樂…身體健康…日日都開心無煩惱。

2014 年香港發生了很多事呢，希望 2015 年會更好。

2015 年…

細C面對好大的挑戰呢…就是由一個無飯煮婦…變成一個媽媽，亦會繼續一步一步走向香薰治療師的大道…

而大C呢…好開心見到佢化妝師條路愈行愈順了。希望伯娘可以早日實現夢想…

搵到自己想走的路…真的是一件幸福的事。

無論是做媽媽、做化妝品師、做香薰治療師…都需要極大的愛心和耐性…有愛…做出來的事立刻變得有意義了。

DO ALL THINGS WITH LOVE

好啱聽呢…2015 年就讓我們朝這個方向進發吧。