BB 奶癬濕疹，椰子油幫到手呀!

之前有朋友 ( 仲要唔係香薰朋友呀! ) 同我傾開自然療法，一講自然療法就好自然會諗起嚴浩。

我對嚴浩的自然療法都幾有興趣，但始終都無行動去試。

直至好姊妹生咗小 baby，剛滿月 baby 就出奶癬，baby 的面仔又紅又痕，痕到瞓唔到覺，搽乜都冇用，連我依個姨姨都心痛到暈咁滯。

好，我哋就置之死地而後生，決定試吓嚴浩教的冷壓椰子油 + 甜杏仁油!
身為一個 small heart 的準香薰治療師，雖然明知香薰可以幫到手，但 baby 真係太細啦，三個月之前都唔用香薰油，用植物油就最啱啦。
之前契女用開的香薰油等佢大啲先試啦! 而且嫲嫲都一定唔會批 baby 咁細個就用香薰啦…

大鄉里呀! 原來室溫下的椰子油，係固體狀架喎!

好不容易，先「筆」到一盒仔出嚟…

之後再加入甜杏仁油…攪攪攪…居然變咗 cream 狀o既質地呢!

再無聊裝飾吓個盒…可愛呢~~~~~

過咗幾日，爸爸打俾我，問唔知點解 BB 會突然甩皮 + 發紅，駛唔駛停用呢? 我回應應該係好轉既反應…

不過我自己都冇乜用過椰子油，於是就將 case 攤開同 miss、同學討論吓! miss 都認為，甩皮係好轉的反應，一段 BB 的皮膚癬都會喺三個月內自己退， 只係用咗椰子油，加速咗皮膚更生。

不過呢，嫲嫲一見 BB 甩皮就唔敢再用椰子油，改返用 Vaseline…情況都好轉起來。
後來再同媽咪傾返，原來 BB 搽完椰子油的第二天，面仔已經明顯地有好轉，而且真係有止痕的作用，對於一個媽媽嚟講，幫到 BB 止痕，已經好幫到手啦!
所以媽咪話依家對我、同埋嚴浩好有信心呀！

咁啱契女面仔又有少少濕疹起咗，不過我調的香薰油始終都有 BB 不太熟悉的氣味，所以搽腳仔佢聞唔到冇反抗，但搽面仔就唔係幾開心啦!
Sorry 呀囡，繼洋甘菊花水之後，契媽又俾啲臭嘢你搽啦…但苦口良藥嘛!

於是呢，椰子油 + 杏仁油 又再一次 apply 喺另一個敏感 B 身上…

兩日之後，我收到契女的最新消息，係開始甩皮啦! 我叫媽媽唔駛驚，繼續勤力搽，係好轉的反應，好快會無事…

唔好以為濕疹得 BB 先會有喎! 其實好多大人都有呢!
而大人的濕疹，有可能係情緒所影響，係一樣咁煩惱的。

明天我再同大家分享吓，另一個大人濕疹既 case 啦…