加強版安睡配方

前幾日有個女仔漏夜成十一點幾十二點 whats app 我，話病咗有冇啲咩精油可以幫到佢哋?

於是我就追問係咩病啦…佢只答，感冒、周身骨痛。

於是我又問，咁你病咗幾耐呀?

佢先話，係爸爸媽咪病咗成個星期，爸爸冇胃口，媽咪就有咳。

佢似乎唔係好識得表達得詳細啲喎! 因為佢主力係想我調安睡配方俾佢，所以我就估，佢爸媽應該都係瞓得麻麻哋。

我都好老實同佢講，精油用於初起既唔舒服係有用的，但係已經病咗成個星期，精油既效果其實真係冇咁快可以幫到佢呢…現階段，可以用比較溫和的茶樹去幫佢增強抵抗力同免疫力令佢哋快啲打嬴場仗，免得用過份強烈 (例如尤加利) 而引致瞓唔到啦…

於是，佢就決定要10ml既安睡複方精油，加玫瑰擴香石。

我見依個妹妹咁孝順，都想佢爸媽快啲好返，本來安睡配方只有薰衣草+佛手柑，我就將佛手柑份量減半，改為加入茶樹，在有限的 budget 裡都可以幫到吓手啦! 

第二日立刻就約交收，真係不出我所料，真係一個著住校服的小女孩，當我話佢知，有加咗茶樹落條複方精油但又冇收多佢錢，她笑了! 分手之後，仲 whats app 講多次多謝!



幫助自己，幫助身邊的人，其實就係我讀香薰的理念。Miss 都有跟我們分享過，她說親戚們都說她讀完香薰之後，更識得去關心身邊的人。身邊的人有唔舒服，就會好主動地去問發生咩事，之後就會走去調油嘗試用香薰療法去幫佢哋。

其實我都係呀，每次用完我調的香薰 feedback 回來說真係有效，或者有啲咩進展，個心真係不知幾開心呀!

雖然距離以香薰治療師作職業的路還很遠，好多時仲係義務貼材料出嚟添。
但係幫到身邊愛錫的人，真係唔會計得到咁多。得到他們的意見和評語，還有鼓勵和認同，在我的學習路上其實係有好大幫助呢!
( 不過我覺得都有朋友仔係好盲目地喜歡我的「功課」囉... )

有機會實踐點都好過咪書呀!