話說上星期同好友去敗家 shopping 換季! 我們都好鐘意去葵涌廣場買衫，其中在頂樓，三聯書局附近的一間小店 - 衫意興隆，我更幫襯咗七、八年，幫襯咗咁多年，老闆娘都知道哂我的喜好，我一去到，佢就會一件一件拎啱我 style 的靚衫俾我。每次一邊傾計一邊敗家，每次都會一大袋地走出門口。基本上我去放完血都已經無時間再逛其他啦!
由於我買得多、又買得平，所以我都好少去講究件衫可以著到幾耐。
直至那天我同老闆娘講，我喜歡雪紡質地的衣飾，但係每一次洗幾次就爛，我覺得好心痛呀 ! 而且雪紡料的又多數偏貴，所以要認真地諗諗係咪繼續買。
老闆娘同好友不約而同地問我「有冇用洗衣袋入住件衫先放去洗衣機洗?」
我：「吓?? 冇喎! 我剩係「爸爸」會入洗衣袋架咋喎!」
他們兩個立刻同我講「吓，唔得架，啲衫最好用洗衣衫入住先去洗，唔同顏色的衫分開洗，一個袋放兩三件衫。唔落洗衣袋啲衫洗完左鈎右鈎，快殘好多架…」
我：「咁…咪要好多個洗衣袋囉?」
「梗係啦！」
好好好…敗完家就去揀洗衣袋啦…
原來啲洗衣袋都有好多 size 同形狀，而且價錢一啲都唔貴，買咗依三個，都只係盛惠 $44.3
今次先試這三個不同牌子不同 size 的，睇吓邊隻最好用再補倉。
最左手邊那一個，我覺得最抵，只需 $12.5，網身比較挺的筒型洗衣袋，感覺上好似耐用啲!
中間那一個，$8.9，我覺得係最 hea 的一個，size 比較細，但窿窿比較密，我覺得可以用來洗雪紡、或者易洗到變型要 special care 的衫，
最右手邊那一個係特大的，最貴$22.9，真係連被袋都可能入到呀! 但質地同條拉鏈都明顯地加厚，係貴得有道理架…
遲啲同大家分享吓邊隻洗衣袋最好用!
沒有留言:
張貼留言