二寶的生活

這裡都棄置了好一段日子了。

突然，想念自己的文字，想起了這裡。
雖則在速食世代裡，已經很少人願意花時間去看文字。
不過，我就是喜歡這裡的清靜…

在離開了的這段日子裡，發生了不少改變。
而最大單的，當然是我居然在疫情最嚴重的時候，為家裡添了新人口。

相隔七年，我家多了一個小寶貝 - 月月妹! 一隻份量十足的小吃貨，跟姐姐有著完全相反的性格。

一個新手二寶媽，遇上一隻小學雞+一隻不睡覺長期當媽媽是奶咀的小B，生活，滿是精彩，要分享的真的很多很多。

第一胎和第二胎的教養，我覺得真的有好大好大分別。

在夫妻分工的學問上，亦都需要花上更大的力氣，時間管理亦更加重要。

近來在看<最高學以致用法>這本書，講到輸入和輸出的比例是3:7。

分享，是輸出的其中一個方法。

等我利用這個 blog 輸出、記錄學到的和想記住的事吧!

薰衣草精油對小孩睡眠的影響

今日打風，無啦啦多了半天的假期。睇怕 12:30 都應該不會落到波，下午不用趕回公司了。

好想分享一下，薰衣草精油對小孩睡眠的影響!
話說年妹由六個月開始，一直夜晚都睡得不太穩定，一晚都會喊醒一兩次。這對大人小朋友都有著好大的困擾!

之前在娘家住的時候，因為房間比較擠迫，好一段時間沒有用香薰機。

到現在搬進了新家，當然就要讓差點封塵的香薰機重見天日啦!

年妹這個精油寶寶，每次媽媽問她是香香嗎? 她都會立刻點頭並露出甜美+期待的笑容!

這幾天用了最簡單的薰衣草。效果實在令我太驚喜。五點多才醒了一次，而且拍拍地就能夠自己再次入睡。

於是第二晚再進行測試，年妹居然睡到朝早6點才喊醒。而且平時她都會瞓到打風一樣，由床頭瞓到床尾，由打直瞓到打橫。但當日居然瞓得好定，同一睡姿維持了大半晚!

真的不得不信呀!

吃飯的氣氛

搬進新家都差不多一個星期了，再完成一個星期的新加坡公幹之旅，終於都有時間坐低休息一下。

搬進新家後，婆婆每朝早來我家等年妹起床，吃過早餐就帶她回自己家! 到我放工就回婆婆家接年妹回家一齊吃晚飯。

我一直都知道，食飯氣氛直接就會影響小朋友的情緒。在婆婆家，年妹經常都不肯好好吃飯。

於是，我們就惟有辛苦小小，堅持每日自己煮飯一齊吃。

年妹這個小鬼，最鐘意一碟碟餸放在自己面前，自己夾自己鐘意食的，一家三口圍在一起吃晚飯，她很樂意自己吃畢整餐飯。

但在婆婆家，就習慣把她放在 high chair，飯餸放在碗裡，婆婆一口一口餵，多數吃兩口就要落地玩。

不消一個月，已經見到年妹愈來愈長肉了。 不用勞氣餵食，其實爸爸媽媽辛苦一點又有咩所謂呀!

2017母乳實況調查

年妹是一個母乳寶寶, 不過年媽極不受泵，埋身夠食但泵就兩次先夠大食妹食一餐。
而且復工後工作好忙，年媽又懶，只能利用 lunch time 泵一次，放工如果要加班就 5:30 後泵多一次，所以一歲前都做唔到全人奶!
對於在公司泵奶，對好多媽媽來講實在是一大頭痛的事，怕老闆唔鐘意自己成日唔喺位、泵完奶要還債開turbo追進度、在房泵奶又怕突然有人衝門蝕底哂、又怕book不到meeting room泵不到奶..... 種種心理壓力真是奶媽才能體會得到!

近來收到香港母乳育嬰協會的電郵，邀請填寫<2017母乳實況調查>，9秒9填好以示支持，大家都來填啦!調查結果將於2017年7月30日公佈。

https://goo.gl/forms/araGKFKH1YPXy4aD3

香港母乳育嬰協會
https://www.facebook.com/hkbfma/

打造全新的自己

近來我對一個幾有趣的 topic - 吸引力法則 著迷了!

話說近來見返一個以前的上司，以前在公司，她已經很關心我，有時也會談心事，遞辭職信那一刻，我倆都講到眼濕濕了!

相隔幾年再相遇, 當然就談近況。話說講到我自己生完年妹後，打理自己的時間愈來愈少，對自己的自信心大大地減少了，覺得自己又殘又肥!

她對能量醫學有研究，她提議，可以試試改變自己的「氣場」。第一步，可以先研究吸引力法則!

一講先知，原來吸引力法則我一早已經有接觸了! 在育兒上、甚至在維繫夫婦關係上，吸引力法則真的很管用。

好多家長都知道，不是經常同孩子講「no」 / 「唔好」 xxx，及要相信孩子可以做得到... 等等!

一個充滿正能量的生活環境，對孩子的成長真的好有影響!
在上一輩傳統的育兒楖念裡，不會經常讚孩子，怕孩子長期被讚壞而變得自大。

我就做過一個實驗，話說婆婆一向都是採取傳統的育兒概念去照顧年妹，什麼都不准，又經常說她曳曳，就算年妹真的做得好，她都只會曲線讚賞！

「依個小朋友唔讚得架! 一讚就曳返架啦!」

我明白是上一輩的育兒概念，不是一朝一夕就能改變，我自己也被潛移默化。
當日我就刻意地不停給年妹注滿正能量…
「哇…囡囡自己食飯食得好企理喎，媽媽錫啖你先!」
「囡囡咁乖自己坐定定睇書，媽媽可以做吓家務，媽媽一陣做完嘢講故事你聽呀!」

神奇的事發生了， 年妹合作配合多了，當晚自己湊女的心情都舒暢好多!

其實湊b就是要enjoy，日日都打打罵罵, 自己嬲爆而孩子也不會開心! 就不如放手+加注正能量+讓孩子自由發揮，順手做個lazy parent.

要堅持在產房第一眼看到年妹時的熱情「囡…你真係好靚女呀!」 讚到連助產士都頂我唔順! 哈哈!

靚靚睡袋防冷親

秋風起🍃啦！媽媽最怕小朋友👶🏻半夜踢被冷親，起身手腳凍冰冰就多數會緊接鼻水都嚟埋😷！

我發現年妹👶🏻踢被的原因，好多時都因為要把腳仔外露抖涼🌬！原來好多小朋友都有這個令媽媽頭痛的問題！🙈

著睡袋會是一個好好的解決方法！之前買了磨菇🍄睡袋，年妹👶🏻可能覺得著完阻礙到自己活動💃🏼，一著就爭脫！😪最後在豬市場(Gmarket)找到了這一件好合身、著起又不會阻礙活動、腳仔可以抖涼，最緊要係勁可愛的睡袋，貪靚妹一見到就嚷著要著，著起就開心到傻笑😬，我說要先拿去洗夜晚才可以用，她都不肯脫下！😂夜晚又肯穿住睡袋睡覺，一整晚沒幫她蓋被、她也沒有搶我被，但手腳都暖暖的，正呀！😍一家都有覺好瞓！💤💤💤💤

💤

寶寶用精油

今日有老友媽媽👸🏻好開心咁同我講，娘家添置了香薰機… 🌸婆婆知道孫女近來氣管👃🏻唔好，開定香薰機等BB回去…

現在好多長輩👴🏻👵🏻都好潮…包括年婆婆…識用🌸精油🌸來處理和舒緩小毛病!

順勢又再一次提醒🗣
除了茶樹🌲和薰衣草💐兩隻🌸精油🌸可以直接搽咗皮膚上…其他都需要稀釋才可以搽在皮膚上…

小寶寶👶🏻使用的劑量(如按摩)是0.5%-1%, 即10ml的底油最多只可以加入2滴精油，局部使用可以看精油的溫和程度而決定…建議最多3%~ 只可外用不能食用!🙅🏻
劑量太高會引致皮膚紅腫甚至灼傷…長期使用高劑量的精油會增加肝的負荷!

建議同一種精油或相同配方的複方精油，連續使用三星期都要暫停一星期讓身體代謝呀!😊

😊

大西洋雪松 - 應付分離焦慮

明天就是暑假後開課的日子啦!
年妹明年先讀N班…但有好多朋友仔都開始返 playgroup 或者預備班…都喊足全程!
對兩歲左右的人仔來說…離開家人獨自上學真是一件極大挑戰性的事!

由小寶貝6個月開始, 分離焦慮就開始出現。
年妹都是其中的表表姐。本來她滿月後已經戒掉夜奶，但六個月後居然一晚要食兩三次。幸好我是埋身餵母乳，一喊就抱埋身餵，可以瞓住餵，要不又要落床沖奶餵奶掃風，無半個鐘都不用再睡。

所以話呢…母乳爸爸真的好幸福的呢!

有問過親職老師…好有可能是分離焦慮的關係…小寶貝依戀媽媽抱住睡的安全感。

其實…要戒掉也是可以的。就是狠心幾天，令小寶貝「死心」。
但我真的不忍心呢，平日日頭上班年妹可以黏住媽媽的時間已經很少。如果為了令自己有覺好瞓而讓她死心，由得她長期缺乏安全感，對她成長都有一定的影響啊。

於是這樣每晚餵兩三次奶的日子過了差不多一年。

過渡完嬰孩時期的分離焦慮，又要開始自己去上學了。好多媽媽都好怕剛上學的小寶貝不知道要哭幾多個星期才適應到新生活。

其實精油都幫到手的呢。

其中大西洋雪松的表現就最出色了。大西洋雪松含多種安神的倍半萜烯，可以協助適應新環境的轉變，克服內心的恐懼，安撫分離焦慮。松科精油刺激性低，可長期使用，即使老人家和嬰幼兒都很適合。

除了大西洋雪松，亦可以加上德國洋甘菊，當中的母菊天藍烴，化學結構就好似媽媽和小寶貝面貼面攬住的溫馨場面，所以能幫助處理親子關係!

雖然年妺一向都不怕生保…但我都好驚她上學時，放聲大哭的是我呢...

分離焦慮真的不止發生在小寶貝身上…戀囝戀囡的媽媽其實都一樣有的呢!

明天第一日開學，或放完產假第一日離開小寶貝上班去的媽媽們記得袋定支雪松啦!

好物推介：Edison 叉匙

年妹學用叉匙都有一段時間了，但依然食得不太理想！

而且她的膠叉匙經常失踪，所以多買一套做後備會比較方便！

有朋友介紹試用不銹鋼叉匙，會比較易控制，極推介買 Edison 來試。米妮是年妹的第二最愛，真係好靚呀!



但比沒有公仔造型的貴十元左右，於是我就找了藉口，買套靚啲為了提高她自己拿餐具的興趣

我也真的幾了解自己個囡喎。她一見到套叉匙就搶住要，還好積極地試用，多付的十元真的沒白花。現在我們給她以前最喜歡偷用的大人餐具她都不願意用，不停指住要米妮那一套呢!

Edison 的設計真的幾貼心，叉叉的鋸齒設計可以卡住麵麵，自然就比較容易把自己從碗裡送到咀仔了。

匙的平頭設計也比較容易把食物刮起挖起，小寶貝努力完可以食到心愛的食物，自然就比較有成功感，就樂意自己進食啦!

而手抦有防滑設計…和特別的形狀也可以幫小朋友掌握怎樣拎起餐具進食。

小寶貝自己進食的好處當然就是爸爸媽媽終於有啖好食，唔駛再食冷飯菜汁啦…有時忙起上來，小寶貝自己食飯，大人還可以爭取時間偷偷哋去做自己嘢。

真的好有相逢恨晚的感覺呀! 所以我都即時多買一雙送給囡囡都就快開始食飯仔的好姊妹! 希望佢都快啲有啖好食~ 哈哈!



Edison 餐具在日本代購或者樓上水貨店都可以買到…約 60 元左右。
我今次就是在 facebook 的日本代購 aloha baby 母嬰用品 買的
http://www.facebook.com/alohababy430

轉載《七十句給孩子正能量的話》(廣東話版)

同小朋友每天說話, 真的有十萬個學問

昨天講完10句用來代替NO的說話, 今日 SHARE 一下 《七十句給孩子正能量的話》

可能之前都有媽媽看過了, 我們重溫一下吧!

大人每天工作壓力大, 往往都會把負能量不知不覺地帶了回家。

想小寶貝成為一個樂天的孩子, 先要給她一個充滿正能量的成長環境!

我自己就發現…睇完這70句正能量的話, 連自己都正能量埋... 勁呀!

1.(豎起大拇子) 或(擁抱)

2.你上軌道啦

3.你係那方面好努力

4.我聽到你嘅感受，好好。

5.結果，好好吖。

6.一切都發展得唔錯

7.我今日以你為榮

8.你收到啦

9.有史以來，你做得最好

10.係面對困難嘅時候，你好鎮定

11.就係咁啦

12.你得嘅

13.你宜家明白哂

14.呢個係一個好大嘅進步

15.我知道你一定做到

16.恭喜你

17.我好開心聽到你今晚所講

18.你好犀利啊

19.你解決咗個問題啦

20.繼續啊，你就得㗎啦

21.好掂喎

22.你一定花咗好多心機啦

23.你值得擁有

24.對你今日所做嘅，爸爸媽媽感到好光榮

25.太好啦，我以後都會記得今日

26.你仲差少少咋

27.多謝你，呢個係我收到最好嘅禮物

28.食腦喎

29.個Idea好正啊

30.咦，我從來冇咁諗過喎，好嘢嚟㗎喎

31.超正

32.好棒(普通話)

33.冇嘢可以阻止你越嚟越好

34.你好有諗頭

35.好有創意喎

36.你好識諗，爸爸媽媽可以放心

37.我當初冇諗過你會做到

38.你揾到你要行嘅路

39.你終於大個啦

40.爸爸媽媽鄧你開心

41.辛苦得嚟有成果

42.你控制得很好

43.你好有自己一套，但係亦好成熟

44.你好上心

45.你懂得係適當嘅時候做適當嘅嘢

46.我睇到你嘅堅持

47.你講得好好，好得體

48.我好開心，我想聽你講多一次

49.你知唔知我好愛你

50.你可以話比你自己聽，你做到㗎

51.阿仔(女)，我對你有信心

52.我知你會諗到辦法

53.我知你唔會放棄

54.無論發生乜嘢事，爸爸媽媽都支持你

55.你係唔會孤單㗎

56.我地一家人嚟咖嘛

57.盡咗力已經係成功

58.唔係你所做嘅嘢，係你， 係你個人，系爸媽心目中永遠都係最好㗎

59.你不斷嘗試的精神，我比個「服」字你

60.爸爸媽媽係你個年紀都唔識(冇你咁叻)啊

以下是有基督信仰的十句:

61.你係主所喜悦架

62.主会係你身上做大事

63.爸爸媽媽唔知點樣幫你，但主總會有辦法

64.望住我，記住我呢個眼神，主呢刻都係咁望你

65.你做到嘅呢D，唔好嫌棄自己，係主眼中已經非常好

66.我地好開心，我相信主宜家都同樣咁開心

67.我感覺到天父宜家都笑緊啊

68.要記住啊，主同我地都好緊張你架，你係獨一無二架

69.爸爸媽媽冇可能無時無刻陪住你，但係主唔係啊

70.係主將你送左比我地

Written by Dr. Louis Kok, MD, PhD

郭廸舜博士

註册心理學家(美國)●

​

10 things you can say instead of "NO"

以前我哋細個…聽到最多一定是"NO" & 唔得…但是現在我們這一代要盡量去減少 NO 小朋友…

要阻止小朋友做不應該做的事…但又唔NO得…的確不是一件易事。

可以參考一下咁講啊!
多謝年妹同日媽媽谷的小分享! 有英文老師媽媽翻譯了廣東話版本呢!

1. 咁樣行唔通喎
2. 我唔容許你咁做
3. 點解咁做嘅? 講畀我聽
4. 我可以幫吓你喎
5. 咁樣做，做唔到喎
6. 一齊試下其他方法呀
7. 或者你可以試試呢個方法呀
8. 我想聽聽你嘅諗法
9. 合埋眼再諗清楚d
10. 我見到你好努力喎

菜菜子焗蛋蛋

不經不覺，年妹已經 19 個月啦！

小妮子是一個行動型的小寶貝…媽媽上班的時間由婆婆照顧…雖然好動令婆婆照顧得有點吃力…但仍深得公公婆婆的寵愛。

好多由老人家幫手照顧小寶貝的年輕父母都有一個頭痛問題…就是餵食問題。父母想小寶貝自己學習吃東西, 但婆婆嫲嫲永遠都唔想放手, 唔想小寶貝食到周身周地污糟, 會選擇快手餵食…乾手淨腳。

但其實小寶貝長大了…想自己食…但又被堅持餵食…就寧願罷食, 老人家就誤以為他們曳曳唔食飯!

這個問題…我好頭痛呀! 其實年妹妹 weekend 都會主力自己進食…我們在旁只是協助…雖然還是偏向用手食，但我們還是每次都附送餐具給她…等她自由發暈。至少讓她增加自己進食的動機…養成習慣!

所以…一見到 finger food 的食譜就會記低。
而另一個頭痛問題…就是年妹近來不喜歡吃菜…
好在水果尤其香蕉和火龍果都來者不拒，所以 poo poo 都未有太大問題!
於是…我看準她愛吃雞蛋的「死穴」…把菜菜埋在蛋蛋裡…

材料:

1.蛋一隻
2.水2湯匙
3.西蘭花三分之一個
4.免治豬肉少許 ( 先用麻油、糖、生粉醃15分鐘 )

做法:

1.免治豬肉先用麻油、糖、生粉醃15分鐘
2.預熱焗爐/光波爐
3.切碎西蘭花
4.把雞蛋和水打散, 放入切碎的西蘭花和免治豬肉

果然成功受騙喎！還肯自己用匙呢！

最後當然還是用手食啦！但肯自己食媽媽都收貨啦！

老公試味都覺得唔錯…其實做埋大人其中一樣餸都完全無問題！準備材料好簡單而且零技巧…基本上改用什麼菜什麼肉都可以…連我這個地獄廚媽都煮得到…應該冇人做唔到啦!

嬰兒沖涼泡泡

每一個媽媽都有些小堅持…就是小寶貝的所有東西, 都想親手為她們準備。

我都是一樣! 年妹還未出世時…我同其他媽媽一樣…去到一年一度的BB展…都大手大手地買嬰兒沐浴露、cream、pat pat 膏等等。

但是買完的一刻…突然清醒! 點解我唔自己做呀?! 我根本就識整!

可惜可惜…錢都乖乖付上了才突然驚醒。

存貨…除了自己買的…還有朋友送的…用到今時今日終於都差不多用完!

終於…可以用自家製的啦! 第一炮是:嬰兒沖涼泡泡!

這個真的不得了! 好簡單容易啊!

材料:

洋甘菊花水 

椰子油起泡劑

甘油

防腐劑

起泡樽

材料就是咁簡單…把所有材料倒入起泡樽即成…兩分鐘內一定完成得了。

椰子油起泡劑 ( Cocamidopropyl Betaine ) 由椰子而成…強清潔力和起泡力, 用量5 – 40 %, 濃度愈高、皮膚愈乾、刺激性亦相對愈高。

除了用椰子油起泡劑…也可以用氨基酸起泡劑 ( Sodium Cocoyl Glutamate ), 同樣地有強清潔力和起泡力…而且相比地比較溫和…好適合做面部清潔用品…當然做小寶貝的沐浴泡泡都非常適合啦! 用量大約15-40%就好了!

配合起泡樽, 就能做出沖涼泡泡啦! 年妹超愛玩這個沖涼泡泡! 每次沖涼都會伸出小手要我泵少少泡泡給她…泡泡一到手就立刻摸在肚腩仔或頭髮上…超好玩呀!

除了用洋甘菊花水，用其他花水都可以的呢! 我還會一物二用用來當潔面泡泡呢! 旅行帶一支全家力來沖涼洗面都完全冇問題呀!

如果想做成杰身的梘液…可以加10%葡萄糖增稠劑, 以後大人都唔駛買梘液啦喂!

蒸洋蔥…增強免疫力、治感冒

近來轉天氣…大人小朋友都好易病呢!

年妹去完旅行回來都不停流鼻水…食完藥都沒有好轉過…

在不同的媽媽谷都不時初起和久久未癒的求救…

止咳就弄個洋蔥水，好多媽媽 ( 包括年婆婆 ) 都話好 work

近來亦有蔥白水止鼻水…不過有待媽媽們親証成效。

每日都在苦惱整咩粥仔的我…見到這個媽媽谷 send 出來的食譜覺得幾好呢…

洋蔥可以殺菌…食吓無妨喎…

洋蔥水放落杯仔飲…蒸過的洋蔥其實一點都不會辣還會有點甜甜的…打成泥加落粥仔真是一個好方法。

可以整定冰磚…在近來的非常時期每日加一小粒去煮粥仔…無聲無息就幫 bb 打定底了…

Be a strong working mom

Working Mom 實在唔係易做，不過我都做咗快三個月了!

老實講，返工後壓力大多了，要照顧小 baby 也要兼顧事業，仲要餵埋人奶，實在係身心疲累的，情緒亦差了不少!

不過天主很照顧我，上班後人奶路算是有點起息，親餵後都不用好似未滿月時要再補奶粉了！漸漸跟 leen leen 一齊的時間都不餵奶粉，直接親餵就足夠了。可惜，都係唔受泵，每天在公司亦不敢花太多時間去泵奶! 實在太邪，每次 office hour 去泵奶返埋位都有人找過我，叫我點安心去呢？

不過，每次同事提到可愛的 leen leen 我都會從心裡笑出來，辛苦暫時忘記

為了 leen leen 我會繼續努力，以身作則兼顧好自己做妻子，媽媽，香薰治療師的職責!

我的母乳路

闊別了一個月…終於都重出江湖啦~

leen leen 已經滿月啦…

leen leen 出世後跟在肚裡一樣…真的好錫媽媽… 

除了在她出世頭兩日可以全人奶之後…日日都要補奶粉呀! 我估…應該是我自己天生乳腺比較幼…乳腺長期都不暢順…而且奶量亦比較少…平時都沒有谷奶或者滴奶的情況喎!

雖則如此…但是我都堅持餵到幾多得幾多…但份量只夠 leen leen 做餐前甜品咋。

連陪月都大讚囡囡好有耐性…因為她真的需要好大力先啜到少少奶奶…而且她黃疸一直都沒有退到100樓下…整個人都會比較累…她好多時都啜到睡著但她仍然好努力啜，而且姑娘都讚她啜得叻叻…媽媽 nipple 沒有太多的「勞損」。

雖然…到現在我的乳腺依然都未通…但好像開始有起息了。由當初給囡囡啜了大半個小時都掃不到風…沒有 vee vee…到現在有時掃多陣就落到格而且有濕片…什至不用補奶粉…

雖然每次見到囡囡用奶樽食奶粉眼仔碌碌的精靈樣…對比啜媽媽奶時的眼瞓樣真的有點無奈…但我依然會堅持呀!

希望繼續努力…三月底返工前可以餵到一半餐數的人奶啦…

準媽媽練力坐姿

之前上了一個孕婦香薰按摩班…MISS 教了一個準媽媽練力坐姿…七個零八個月就可以開始做了。

方法好簡單…就是反轉張椅來坐…椅背加上厚毛巾或者 cushion。

我都試過這樣坐著來用電腦…其實都ok的…不過可能我家的椅比較闊…坐一陣就有點累了。老公就話人哋教係咁樣坐著看電視而不是對電腦…咁樣坐住做嘢唔攰就奇啦

大家都可以得閒就咁樣坐練吓力…坐半個鐘至一個鐘就夠架啦!

金盞花浸泡油 - 用咩油好呀?

連續講了幾日孕產婦的恩物…我哋今日又講返之前浸的金盞花浸泡油吧。

曾經我都有疑惑過…金盞花浸泡油應該要曬太陽嗎?

有疑惑就當然問吓老師啦。

老師話其實曬唔曬太陽取決定我們用什麼基底油來浸。

如果用比較便宜的基底油…例如我今次用 olive oil…就可以曬曬太陽了。植物的有效成份先可以落到油到，不過基底油的營養就可能沒保存很那麼好了。大約一個月就可以收成啦!

但如果用比較貴的基底油…如用 jojoba oil…亦想要埋基底油的營養…就可以放在陰涼地方…用較長的時間約兩個月去浸油…植物和基底油中的營養都可以拎得到了。

記得每天都要上下搖晃一下啊…植物有機會會索油…如果見到油沒有全部蓋住植物時就要多添基底油了。

延伸閱讀
金盞花浸泡油

孕產婦恩物#3 - 紅豆水

好好好…繼續嚟孕產婦恩物#3先…

水腫係好大部份準媽媽都會遇到的…其實我自己水腫都不算太嚴重…不過我就好驚如果一直都唔理…本來已經夠大的大腳八腫到一發不可收拾的話…生完會再大一兩個 size 就麻煩了。

所以我一覺得自己有啲腫…就會整紅豆水來去去水腫…

自從發現原來燜燒保暖杯都可以方便地整紅豆水…我就愈來愈勤力飲啦…因為實在太方便了。

不如都同大家 share 一下做法啦…

材料:
紅豆 (其實我好隨意地拎一堆)
茶葉袋 ( 只係方便而已…唔用都得 )
燜燒保暖杯

紅豆浸大約一小時…不過有時懶…只係洗乾淨就入杯架啦…一樣焗到的…

之後放入茶葉袋中…放入燜燒保暖杯中加熱水焗 4 小時就可以了。

係咪好簡單呢?

焗出來的紅豆水是這樣的。

我試過焗得太耐…紅豆水會變得好深色…

而且紅豆都焗到爛了。其實是失敗的。

因為紅豆去水腫的成份在紅豆皮…如果紅豆煲爛了…變相仲會多咗澱粉質呢…

如果沒有燜燒保暖杯…可以煲一煲水…之後放入紅豆…熄火焗三十分鐘…一樣可以做出紅豆水架!

記得呀, 不能煲爛紅豆…不用加糖…只飲水不吃豆才能做到去水腫的功效呢。

而剩了的紅豆…可以放入麵包機整紅豆蓉做甜品或麵包…一樣好好味架!

聽說…紅豆水可以去水腫之外…仲有舒緩便秘的作用。而且紅豆正氣…準媽媽要避免食寒涼的薏仁來去水腫…紅豆水的確係最好選擇呀!

孕產婦恩物#2 - 白蓮鬚

相信好多媽媽都識得白蓮鬚這東西。

我媽咪陀我同細佬時都有飲…媽咪就話係清胎毒的…我跟細佬嬰兒時代又真係皮膚幾好架喎!

不過近年都有好多對白蓮鬚不同的 comments…先有說不乾淨…也有說會令生產時子宮難開…等等…

其實早在懷孕六個月左右…媽咪就已經買定了叫我煲來飲。但我一來懶…二來就是對白蓮鬚沒太大信心。

於是我就去看了中醫…問一下自己的體質適宜飲白蓮鬚嗎? 食乜嘢可以幫助去胎毒。

不過中醫就話…白蓮鬚不是用來清胎毒的…而係幫助「易啲生」。望一望我的下盤…就話我應該冇乜問題了…( 哈哈…盤骨王係名不虛傳架.. )

而且中醫把脈後說我個人一啲都唔熱…而且沒有胎毒就不用刻意去清啦! 反而不適宜食太涼的東西。

而我亦都問過我的香薰老師 Ms Cheng…她有一個兩歲的小女兒而且她也是中醫及草藥學碩士…問佢實冇死啦…其實 Miss 自己都沒有刻意在產前清胎毒…不過她都建議可以在生產前吃西瓜…簡單又安全。

於是…白蓮鬚就俾我放埋咗一邊了，只是飲奶奶得閒烋吓的腐竹雞蛋糖水。

直至上星期一回娘家吃晚飯…媽咪煲了白蓮鬚給我…發現對我幾有用喎。

38週的 leen leen 已經有7 磅 2 安士了…後勁非常之凌厲! 六星期重了兩磅幾三磅。可能因為重得太快了…一下子我的肚子大了很多…覺得墜了很多…而且開始有責住膀胱的痛苦…經常都覺得尿急但其實小便只有很少而已。

神奇地…飲完白蓮鬚第二朝…發現責住膀胱的假尿急情況改善了不少。聽媽咪的朋友講…白蓮鬚都有利尿的功效…可能就是改善了假尿急的原因了。

而亦有陪月姨姨教路…帶住白蓮鬚入院待產都可以幫助易生啲…都一試無妨呀!

我亦有問過其他媽媽…她們對白蓮鬚的反應沒我那麼明顯。可能就係因為其他媽媽都比較穩陣…白蓮鬚始終是比較涼的…飲一碗就收手了。而我第一次飲已經係足哂月 leen leen 可以隨時出世…而且自己又傻吓傻吓天不怕地不怕…一飲就三碗…可能就是這樣…效果就咁明顯了。

都話有媽的孩子像個寶…好在媽咪煲了白蓮鬚給我…舒緩了不少不適…
雖然媽咪工作好忙唔多照顧到我同 leen leen，但你一直的關心已經令我好窩心了 !

順便出賣一下 leen leen…俾大家睇吓佢周身郁既曳曳video... :p