Double C's Talk

2014年10月3日星期五

慳位地收好床單 + 五分鐘換被袋

細C有舖買床單癮的呢…見到有靚床單就會忍不住買…所以屋企都有好幾套床單 + 被袋呢…

開始要執屋騰出空氣迎接 leen leen…無意之中見到這個收好床單的小方法…同大家 share 一下吧。

結婚幾年…我依然不是一個稱職的師奶…

成日都覺得床單的橡筋好麻煩…成日都唔知點摺先會整齊。而且次次拿出來用時都是皺巴巴的…

而大肚之後換坐單這個工作更加不是我工作啦…

但睇完上面 video 之後…立刻把被老公洗完就塞入櫃的床單拿出來整理一下。

果真是又整齊又慳位呢…一個枕頭的空間就可以收好一張四呎半床單、一張 queen size 被袋、兩個枕袋了…

上面個 video 太快嗎? 可以參考埋下面這個…異曲同功但更加詳細簡單…尤其鐘意 video 前半part亂塞床單的片段…exactly 係我哋之前的情況呀! 哈哈…

新手師奶真係要試吓啊…慳位又整齊…可以繼續買靚床單啦…哈哈!

順手 share 另一個我都覺得好好用的五分鐘換被袋 video 俾大家…以前要同老公兩個人合力先換到一個被袋…現在我自己一個大肚婆都換到…係咪勁先?

2014年10月2日星期四

零失敗的朱古力麵包

難得連放兩天假…都沒有安排節目…老公要返工…自己就好好在家休息養胎

昨天效率幾高呢…執好咗個廳…見返張餐枱…可以開始為月尾的補考全力開工啦…

夜晚仲好神心地用差點封塵的麵包機整了朱古力麵包呢…今朝就有早餐食了。

真係要同大家分享一下這個在 facebook 搵到的朱古力麵包食譜…

整過無數次都是成功的，麵包質感好軟熟而且可以大量加朱古力粉或朱古力釘，造出一個極朱的靚包呀。

材料 ( 1 磅 )

1. 鮮奶 180ml or 朱古力奶 190ml (因朱古力奶較杰身)

2. 高筋麵粉 2又1/4杯 (約240g)

3. 鹽 1茶匙 (約5克…我多數都用麵包機送的量器)

4. 糖 1湯匙 ( 約15克…我都係多數都用麵包機送的量器)

5. 牛油 3湯匙 ( 約45克…有麵包機送的量器都可以用就方便好多 )

6. 朱古力粉 20g ( 我會落即沖朱古力粉…一包就28克左右…有時想濃味啲仲會著兩包 )

7. 酵母粉 1又1/2茶匙 ( 我好 hea 架咋落一包3克就算架啦)

9. 朱古力粒(入爐免溶) 30g (係響聲時加入) ( 想濃味啲就落多啲…今次我改了用藍苺乾)

常用的材料換算表

其實真的沒什麼技巧…先把液體放入包桶…之後再加麵粉等乾身材料…酵母就記得要盡量同鹽分開…

三個小時後香濃朱古力包就出爐了!!

今日早上一杯奶…加兩片麵包…再加多一舊雪印芝士…營養真係夠哂啦…要努力幫 leen leen 增返肥先得呀!!

2014年9月30日星期二

25 週的產檢

踏入五個月後…產檢由四星期一次拉長到六星期一次…醫生話 baby 屬於不算細的 size…不過都建議我每日可以多飲一杯奶。

我不是一個很細心的媽媽…覺得自己一直都有食 Materna，五個月後更加多了鈣片…所以一直都沒有刻意飲奶…直至前幾日老公的同事提醒記得多飲奶…BB 出世會白好多…

不設實際的我…立刻有衝動要作最後衝刺飲多啲奶…我要 leen leen 出世又白又滑呀! 依家醫生叫飲都一定要飲啦!

醫生提醒…兩星期後就要開始記錄每日朝九晚九的胎動次數了! 如果少過 10 次晚上就要看醫生了! 不過 leen leen 好乖呢…就算之前我話佢郁少咗但一日都郁到10次架…隻豬仔一個兩個鐘頭應該都郁到10次了! 有時郁少咗…叫一叫佢郁就會彈兩下報平安啦!

今日仲第一次影了4D添…不過 leen leen 有點怕醜…不是在做 yoya 就是用手手遮住了面仔…

就是擰側面…只係勉強影到她的面仔，同爸爸一樣有個肥面珠仔喎…

回家仔細看超聲波的數據…之前產檢 leen leen 每次都比實際 size 大了五日…

六星期冇見醫生…25週3天的她…今次居然只得 24 週 2天…計返之前大了的 5 天…足足瘦了兩個星期呀! 陰公豬囉…怪唔得我同醫生講…QE 醫生話 BB 肚 dum 特別大…醫生話唔多覺啦…

係咪我哋笑佢大肚 dum 笑得多…leen leen 自己在肚肚入面狂做運動減肥呢? ＿

又唔知係咪因為之前病了幾日…近來嫲嫲又少了烋魚湯所以 leen leen 都瘦了呢?

雖然我六個月既肚似人哋四個月既肚…但體重卻重得比之前多了…六星期前58.7kg…今日已經61.6kg了…重了6磅幾了! 終於都 meet 唔到每星期一磅的標準了。

還有自己開始有一點水腫…帶開的介指都開始除不出來了。

希望體重的增長是來自水腫而已啦!

在網上搜集資料…知道大肚媽媽可以烋紅豆水來去水腫…已經叫婆婆幫手買紅豆旁身以防水腫繼續惡化。

試完話俾大家知紅豆水係咪可以去到水腫呀吓…如果唔係大肚媽媽…可以飲薏仁水去水腫的…不過薏仁比較寒涼…大肚媽媽係不宜食用架…

source : http://www.nutriciaprogram.com.hk/Milestones/Article/2nd_Trimester_Pregnancy_Week_25

2014年9月2日星期二

[試用] 一試愛上的ANNIE'S WAY 果凍面膜 (下)

遲來的下篇，因為開始年尾旺季有點忙，讓大家久等了！

前篇請到-->[試用] 一試愛上的ANNIE'S WAY 果凍面膜 (上)　

前文說到好姊妹不斷熱推，所以請她幫忙在City Super買了兩隻凍膜來試用，分別是熊果素玻尿酸淨白果凍面膜及蜂蜜深層保濕果凍面膜。

洗面後，試用前先用爽膚水拍打皮膚，提升後續的吸收效果。然後厚敷0.3-0.5mm，個人建議愈厚愈好，每次我也會敷差不多45分鐘才用附送的刮刮走餘下的果凍，刮走後鼻上一些深層的污物立即冒出頭來，超神奇。

介紹一下我的敷面子方法，這個是在網上看到的方法，可以提高效果，而實驗証明是真的，我的頑強黑頭真的有更易走出來，洗完面已經看到白色的粉刺站起來了！

爽膚水後，厚敷凍膜，其實應該在上層加上充滿爽膚水的面膜紙，不過我忘記去莎莎買回家，所以便用麗的化妝棉充面膜紙啊!