金盞花浸泡油

哎呀! 又好耐都冇更新啦!

近來都係忙於返學…忙於玩…見朋友…當然仲有準備寶貝囡出世既大小事宜啦…

因為我同老公都是有皮膚敏感的人…甚至連奶奶都有濕疹! 所以囡囡都應該無可避免地遺傳到敏感皮膚的了! 所以近來都在研究有什麼可以準備定第時俾囡囡用! 還專登在台灣訂了這本書來研究呢!

第一樣想到的…就是浸金盞花浸泡油。因為浸都要浸起碼一兩個月…所以要早一點準備。

首先…在 ikea 買了一個玻璃闊口樽…

後來發現原來要買到比較高質素的金盞花都不是一件容易的事。
好在…有同學仔幫手周圍搵…好不容易才在太子才買到歐洲入口的…而且價錢亦不算貴好多…起碼用得安心啊~

再在惠康買了一支 cold extracted extra virgin 的 olive oil. 自從學了香薰…每次去超市都會跑去睇有沒有冷壓的植物油賣…

而這個品牌近來出現在我家樓下的惠康仔…其實原價一點也不便宜…但…長期有特價喎! 之前1L 特價賣 $62.9, 昨天我買 $58.9 而已。

不過真係要留意…一定要買 cold extracted extra virgin 這一款呀!

依隻平幾蚊既唔係 cold extracted 架…

材料就只有這三樣…一切準備好就可以開工了。

首先…先洗乾淨濶口樽…之後放進焗爐烘乾消毒。( 哇…原來個焗爐咁 dirty.. :p )

之後…把金盞花倒入樽。本來我仲以為兩包 30 克的會不夠裝滿一樽…但放完一包落去都已半滿了。

我又貪心多放了五分一包下去。

最後…1L的油根本連蓋過金盞花都不夠。我估…1L油加入 30 克金盞花應該就差不多了。Miss 教我…油只需蓋過金盞花多少少就可以了。而且花會索油…之後可以再加更多的油落去。

現在明顯不夠呀! 

惟有拿拿聲再去買多支油，起碼要加到這個份量呀! 之後如果油索哂…再慢慢加落去啦…

雖然…各大賣香薰底油的地方都會有金盞花浸泡油賣…但媽媽為 BB 親手浸的…始終唔同…可能療效更好架!

各位媽媽都不妨自己浸吓呀!

Saturday Tea

近來的星期六都要在銅鑼灣看舖，老公有時會過來陪我，我就會請佢食 tea，super sandwich 的 tea set 價錢唔貴但又多選擇，又坐得舒服，所以連續幫襯了幾次呢！

今日老公遲放工過唔到嚟，午餐只好自己搞掂！超難食的茶餐廳無益外賣都要成三十幾蚊，見無咩生意就對自己好啲去歎個tea吧！

平時同老公食，怕佢唔夠飽多數會叫公司三文治，不過今次自己食，叫個輕便的蜜味火腿 菠蘿 芝士飛碟 + 熱檸水就好了！

 

相比食開的公司三文治…我覺得飛碟更好味喎! 因為我鐘意比較軟身的麵包三文治…而 super sandwich 的三文治應該要烘過底所以比較硬身。 

而這個火腿芝士菠蘿飛碟更是我杯茶…半溶夠份量的芝士同火腿永遠都是好拍檔…加入菠蘿口感更見豐富…

下次要試埋牛角包 tea set 先得呀!

荃灣 Beans

相信好多住荃灣的朋友仔都有留意到 hit 了一輪的 beans…

想試好耐…但是見到條人龍就放棄了。

不知是否因為在隔離多開了一間分散人潮…今日居然只需排兩張枱大約15分鐘就到了。
終於一嘗所願試到了…順便慶祝肚子裡的囡囡明天八個月的生日…

飲品先到…我點的是黑糖薑母茶…味道好鐘意呀! 而且又唔會太甜…好啱孕媽媽在冬天裡飲用。



老公點的是凍咖啡…不過有點失望…這個我沒有試…聽聞好苦喎!

再來…是忌廉汁蟹肉蟹棒意粉 ( $78 ) 意粉煮得啱啱好…煙煙 un un 好好味…而且忌廉汁又唔會太膩…蟹肉和蟹棒都不過不失…只嫌份量少了一點唔夠喉呀! 

焦糖單骨雞翼 ( $42 ) 甜度剛好呀! 而且上碟時仲好熱辣辣…好香呀! 單骨雞翼都食得好方便…不過有兩隻雞翼size細得好過份…又係唔夠喉呀!!

再上桌的是加餐的蝦餅 ( $15 ) 好抵食呀! 好鐘意 Beans 所有食物都是熱辣辣的。

最後到的三重芝士三文魚薄餅 ( $78 ) 這個絕對是老公點俾囡囡食的…因為有芝士和三文魚…對於一個芝士狂熱份子嚟講…芝士味都算ok…但可以再濃啲! 而三文魚份量都不少…但略嫌鹹了少少，好在批底都做得幾好味幾脆口呢…

值得一提的是…全店免加一喎! 依餐只係 $213 埋單…就試到咁多款食物…都幾抵食呢。

孕期只剩低個多月…真係要多享受二人世界拍拖食飯的時光…

鈎 headband

又要講多次…生女真係好大件事呀!!

細 C 終於都考完試…同囡囡講好了…11月要多放時間陪佢…仲要好好休息一下…突然同伯娘齊齊都想學鈎嘢喎! 其實想學好耐了…鈎出來的織物真係靚過織好多架…

我已經急不及待叫同事帶我去買定了靚靚 bb 冷打算鈎被仔…

仲幫我揀好一個易鈎的 pattern 

同事好好…仲話教我添…希望快啲有得學就好啦…

今日要去檢查…朝早在家沒事做在 youtube 見到可以學織 headband 喎! 我正想敗啲 headband 俾囡囡呀! headband 又比較快完成…看似又不是太難…

又要去買啲粗冷嚟試先…


這個 bb 版用幼冷都幾靚喎!!

重返 iPhone 懷抱

近來的炒 iphone 熱潮開始減弱了…大細 C 都從中賺了一千幾百零用錢…

我倆都打算換 iphone 呀…細C就為了可以幫 leen leen 影靚相，大C就為了影 job 相…其實大家動機都好認真架…哈哈

我們之前一齊去睇過實物…都覺得 iphone 6 plus 實在太大部了…所以都打算買 iphone 6 就 OK 了…而且…銀色真係好靚呀!



不過暫時都有少少難訂喎! 我們都脫離 iphone 行列都有兩三年了…就在等機時我們溫故之新吧…

http://www.iphonenews.cc/2014/09/iphone6-tips.html?m=1

椰子油肚肚膏

自從有了囡囡之後…與身邊的孕媽媽或新手媽媽朋友特別好傾…不過呢…我同結婚時一樣…很少上 forum 找同期的 B2B 或者準媽媽交流…真係連 esdlife 和 baby kingdom account 都冇開呀!

因為我身邊的朋友都好好…知道我忙到極點…有什麼消息都會通知埋我!

不過我都有報恩的呢…就好似 leen leen 朋友仔 Dennis 的媽媽…是我的大學同學的老婆…本來都只是在他們婚禮上見過面而已…但大家都因為懷孕而變得熟絡…感覺就好似多了一個好朋友呢…

Dennis 比 leen leen 早一個月出世…所以去聽什麼講座呀…要買什麼呀…邊度特價呀…自己有什麼唔舒服呀…我們都會互相交流。

早幾日 Dennis 媽媽說肚肚好痕而且肚底勁爆紋…現在搽完 olive oil 仍是痕癢難當…

於是我就建議不如試一下用椰子油啦…對止痕有用的。不過我自己就沒有親身証實過…難得有白老鼠親身証實…yeah!

對於現在極乾燥的秋天天氣，之前 blend 給自己的肚肚油在夏天時覺得夠潤，但現在都變得太爽身了。於是我又研究了新的肚肚cream…

材料如下
椰子油 35ml
甜杏仁油 20ml
bee wax 20g
shea butter 2 匙
橙花精油 5  滴

先把所有材料隔水加熱…等 bee wax 全部溶哂就可以熄火了。

由於燒杯依然好熱…心急的我唔想等呀…就把燒杯放於在裝有室溫水的大杯上降溫。由於我是第一次用 bee wax 來整 cream…其實都沒有太大信心…但都即管試吓啦…

隔了一陣…發現開始有少少變硬喎!! 於是就用玻璃棒攪拌…真係變到 cream 狀喎!!!

極度開心呀!!!! 這是完全天然的 cream cream 呀!!
第時可以做給 leen leen 用啊…

我自己試用過就覺得好舒服又易推…所以都好滿意…
淡淡的椰子油味好香呀…不過感覺就好似蝕咗 5 滴橙花精油囉…因為俾椰子油蓋過哂啲味…

希望都可以解決 Dennis 媽媽的肚痕同爆紋問題啦…

如果有媽媽有相似既妊娠紋問題…都可以留言…睇吓我幫唔幫到你解決啦…嘻嘻…

新開始

明天…是一個新開始了。

懷孕後…繁忙的工作變得更有壓力。工作永遠做不完，做不完就要加班…日日 830 都面不改容，回家是但解決晚餐就掂了。

但現在呢…為了 leen leen 多了回奶奶家吃晚飯…多啲湯水多啲住家飯…生活健康一點嘛!

但是要回奶奶家吃晚飯…都會帶來不少壓力…雖然屋企人都好好…明白我工作忙夜收工…都叫我唔駛急…等埋我夜啲食飯都冇所謂。但是…成村人等我一個我又於心不忍…

唔 OT 又做唔哂啲嘢喎! 有時產檢放了一天半天假後…工作就開始落後了…

日積月累…日日收到很多投訴…多到老闆都嬲嬲了!

剛好公司有大規模的 job rotation…明天開始終於手頭上的沉重的工作被抽起了…
而我亦都只剩下兩個多月就放產假…公司都希望我轉戰後勤工作，放完產假回來再安排新工作。

阿Q精神同我講：我終於都享受到大肚帶來的福利了。終於都可以了放低壓力、準時收工專心養胎了。

俾著以前的我…我一定會覺得好唔開心…甚至應該會即時 resign…

但現在有了 leen leen…心態真的改變了…一切都想為囡囡設想多一點，反而覺得這個安排其實對我是最好的…提早交接工作…之後就可以無牽掛地享受10星期的產假了。放完假回來會怎樣…who knows?

等我好好安排吓未返學、又可以準時收工的這個十月…每個晚上要怎樣過呢…

近來得閒少少…又身痕痕整 skin care 啦…還在研究 leen leen 第時用的 skin care…我要重拾返自己香薰治療師的身份呀!