峴港叉電之旅 Day 2

晨早八點（即香港時間九點）年妹就準時起身啦！感恩這兩日她都能夠跟到慣常的作息時間！

昨晚可能頭髮未乾透就睡著，而且也沒太反瞓，一起身就頭髮亂了！哈哈！貪靚妹趕緊自己梳頭保持形象！

之後就去享受自助早餐啦！
食物款式比我們想像多，質素也不錯！
明天要早點起床慢慢歎！

有好多年妹都食得呢！發達啦！

早餐10點完我們食到最後一刻！之後就回房間休息一會，再搭的士出去 market 逛街！

旅遊節目好似都介紹過！

之後就再行去 Big C..... 阿囡亦宣布無電了！揹住隻瞓著的豬仔在烈日當空行了差不多三十分鐘，熱到熔呀！

所以一到 Big C 就要坐低飲杯凍飲食件包休息一下！

等阿囡醒了就去逛 Big C... 同泰國的格局好似但貨品種類少得多，不過年妹都玩得不亦樂乎！

玩完就回酒店，洗個面又帶年妹去酒店的 kids centre 玩啦！

室內的玩唔耐，年妹急不及待要出去玩，果然比較熱愛戶外活動呀吓！陽光不太猛烈玩得好舒服呢！

玩完就到午睡時間，一睡就兩小時，瞓到好冧呀！成頭濕哂！

之後趕緊把握時間去泳池游水，好舒服的泳池，我哋又包場啦！

不過入黑有點涼，年妹玩到不願走，上水一刻凍到她不停震，立刻跑回房間沖涼洗衫又出去晚飯啦！

準備出去才發現落大雨！好在附近有地道嘢食！

港幣七十元落樓的晚餐也不錯，年妹都落力密密食！

回到房間，再補包全脂奶，食個包包就讓她睡了！

明天一大早就要出發啦！拜託唔好落大雨呀！

峴港叉電之旅 Day 1

休息，是為走更遠的路！

近來生活都在抱怨聲中，在公在私都覺得自己受著不公平對待！心力，都很交瘁！

老公成日嚷著去旅行，其實我想慳錢多一點！但我又真的想好好休息一下！
本來目的地定在沖繩附近的石垣，但有機票卻沒酒店！退而求其次定在越南的峴港，雖然簽證貴但勝在酒店和消費便宜得多！

同老公講想 hea 遊，不想趕頭趕命！老公就訂了酒店有泳池有兒童玩樂設施的，其中兩日更有spa, 準備多放時間留在酒店，好讓我可以真正休息一下！機票剛好又是唔太靚的下午四點機，不用倒塌咁早趕去機場，實在正呀！

Hea 到朝早才執行李，一點多才出門去機場，年妹成程車都好乖，自己坐自己望風景！

上到飛機，年妹睡足全程，只是落機時被吵醒喊了一會兒，我都可以睡大半小時，真係一個 hea trip 嘅好開始呀！

等簽証時年妹還認識了一個比她大兩個月的靚仔中韓混血兒，兩隻傻豬仔還 big hug & kiss kiss... 他的爸媽都好 nice 呢，希望回程時都可以相見啦！

在機場換好錢就塔的士去酒店，一到步就有 welcome music... 看得年妹好開心！房間裝修簡潔，好有家的感覺！即時周圍噴了香茅驅蚊噴霧，即時成間房變了泰國 feel 變得更舒服呀！

我們 settle down 都已經是八點多了！見酒店內的餐廳不算貴就決定不出去了！

意外地包場呢！

阿囡極喜歡接待我們的女侍應

叫了一枱食物，也只不過三百多元港幣，味道雖不算好驚喜，但乾淨最緊要嘛！

食飯氣氛的確重要！年妹近日出牙仔，在家怎樣氹也什麼都不願多吃，只肯飲奶，但今日居然主動什麼都要食，而且還吃得不少！見到她的食相真的很療癒呀喂！

因為有吉房，我們得到 upgrade offer，房間有我們超想要的浴缸，BB 可以玩水，爸媽可以浸香薰浴，正呀！食飽年妹周圍 social 一陣就回房間玩水，因為搬家後家裡沒有浴缸，平時只有在浴盤玩，難得有大浴缸玩水真的好開心呀！

沖完涼好快就睡著了，就到我浸香薰浴啦！酒店驚喜地提供浴鹽，原來還加了薰衣草呢！

浸完即時就壓力盡消，能量返哂嚟！

見到這個睡得很舒服的豬仔，加上比家裡大一倍的大床！今晚終於不用就住就住嚟瞓啦！

我要多謝老公堅持要我一齊放這個叉電假期！Good Night!

大西洋雪松 - 應付分離焦慮

明天就是暑假後開課的日子啦!
年妹明年先讀N班…但有好多朋友仔都開始返 playgroup 或者預備班…都喊足全程!
對兩歲左右的人仔來說…離開家人獨自上學真是一件極大挑戰性的事!

由小寶貝6個月開始, 分離焦慮就開始出現。
年妹都是其中的表表姐。本來她滿月後已經戒掉夜奶，但六個月後居然一晚要食兩三次。幸好我是埋身餵母乳，一喊就抱埋身餵，可以瞓住餵，要不又要落床沖奶餵奶掃風，無半個鐘都不用再睡。

所以話呢…母乳爸爸真的好幸福的呢!

有問過親職老師…好有可能是分離焦慮的關係…小寶貝依戀媽媽抱住睡的安全感。

其實…要戒掉也是可以的。就是狠心幾天，令小寶貝「死心」。
但我真的不忍心呢，平日日頭上班年妹可以黏住媽媽的時間已經很少。如果為了令自己有覺好瞓而讓她死心，由得她長期缺乏安全感，對她成長都有一定的影響啊。

於是這樣每晚餵兩三次奶的日子過了差不多一年。

過渡完嬰孩時期的分離焦慮，又要開始自己去上學了。好多媽媽都好怕剛上學的小寶貝不知道要哭幾多個星期才適應到新生活。

其實精油都幫到手的呢。

其中大西洋雪松的表現就最出色了。大西洋雪松含多種安神的倍半萜烯，可以協助適應新環境的轉變，克服內心的恐懼，安撫分離焦慮。松科精油刺激性低，可長期使用，即使老人家和嬰幼兒都很適合。

除了大西洋雪松，亦可以加上德國洋甘菊，當中的母菊天藍烴，化學結構就好似媽媽和小寶貝面貼面攬住的溫馨場面，所以能幫助處理親子關係!

雖然年妺一向都不怕生保…但我都好驚她上學時，放聲大哭的是我呢...

分離焦慮真的不止發生在小寶貝身上…戀囝戀囡的媽媽其實都一樣有的呢!

明天第一日開學，或放完產假第一日離開小寶貝上班去的媽媽們記得袋定支雪松啦!

好物推介：Edison 叉匙

年妹學用叉匙都有一段時間了，但依然食得不太理想！

而且她的膠叉匙經常失踪，所以多買一套做後備會比較方便！

有朋友介紹試用不銹鋼叉匙，會比較易控制，極推介買 Edison 來試。米妮是年妹的第二最愛，真係好靚呀!



但比沒有公仔造型的貴十元左右，於是我就找了藉口，買套靚啲為了提高她自己拿餐具的興趣

我也真的幾了解自己個囡喎。她一見到套叉匙就搶住要，還好積極地試用，多付的十元真的沒白花。現在我們給她以前最喜歡偷用的大人餐具她都不願意用，不停指住要米妮那一套呢!

Edison 的設計真的幾貼心，叉叉的鋸齒設計可以卡住麵麵，自然就比較容易把自己從碗裡送到咀仔了。

匙的平頭設計也比較容易把食物刮起挖起，小寶貝努力完可以食到心愛的食物，自然就比較有成功感，就樂意自己進食啦!

而手抦有防滑設計…和特別的形狀也可以幫小朋友掌握怎樣拎起餐具進食。

小寶貝自己進食的好處當然就是爸爸媽媽終於有啖好食，唔駛再食冷飯菜汁啦…有時忙起上來，小寶貝自己食飯，大人還可以爭取時間偷偷哋去做自己嘢。

真的好有相逢恨晚的感覺呀! 所以我都即時多買一雙送給囡囡都就快開始食飯仔的好姊妹! 希望佢都快啲有啖好食~ 哈哈!



Edison 餐具在日本代購或者樓上水貨店都可以買到…約 60 元左右。
我今次就是在 facebook 的日本代購 aloha baby 母嬰用品 買的
http://www.facebook.com/alohababy430

開心 share - 極速原條新鮮粟米起肉取汁法!

年媽有個好姊妹糖媽…由大肚一直 friend 到依家…兩隻 bb 同月出世…成日一齊玩。

近來年媽想學學煮嘢食…就成日請教識飲識食的糖媽!

每次 home gathering 糖媽都照顧埋年妹的飲食…更大方傳授秘技…怎樣煮得又好味又健康!

其中一款就係好多小朋友都鐘意的粟米啦! 年妹超愛吃，但是成日都消化不到…食完之後那一天一定會知佢食過。

糖媽就教我先在粟米粒中間界一界…再刮粟米出來…粟米衣就會保留在粟米心, 刮出來的粟米肉+粟米汁就更好味易消化啦!

地獄廚媽又問啦…咁用生粟米定熟粟米呀? 糖媽解答係用生粟米，熟粟米會比較痴身，而且粟米衣會甩埋出嚟!

糖媽有心機到有圖教學…又有短片示範…夠清楚啦呱? 真的又快又正的呢! 大家都試吓呀!

糖媽的 facebook page 還有好多大人小朋友的食譜, 唔難 follow 的…得閒去睇吓偷吓師!

糖兄糖妹•女子•潮媽

轉載《七十句給孩子正能量的話》(廣東話版)

同小朋友每天說話, 真的有十萬個學問

昨天講完10句用來代替NO的說話, 今日 SHARE 一下 《七十句給孩子正能量的話》

可能之前都有媽媽看過了, 我們重溫一下吧!

大人每天工作壓力大, 往往都會把負能量不知不覺地帶了回家。

想小寶貝成為一個樂天的孩子, 先要給她一個充滿正能量的成長環境!

我自己就發現…睇完這70句正能量的話, 連自己都正能量埋... 勁呀!

1.(豎起大拇子) 或(擁抱)

2.你上軌道啦

3.你係那方面好努力

4.我聽到你嘅感受，好好。

5.結果，好好吖。

6.一切都發展得唔錯

7.我今日以你為榮

8.你收到啦

9.有史以來，你做得最好

10.係面對困難嘅時候，你好鎮定

11.就係咁啦

12.你得嘅

13.你宜家明白哂

14.呢個係一個好大嘅進步

15.我知道你一定做到

16.恭喜你

17.我好開心聽到你今晚所講

18.你好犀利啊

19.你解決咗個問題啦

20.繼續啊，你就得㗎啦

21.好掂喎

22.你一定花咗好多心機啦

23.你值得擁有

24.對你今日所做嘅，爸爸媽媽感到好光榮

25.太好啦，我以後都會記得今日

26.你仲差少少咋

27.多謝你，呢個係我收到最好嘅禮物

28.食腦喎

29.個Idea好正啊

30.咦，我從來冇咁諗過喎，好嘢嚟㗎喎

31.超正

32.好棒(普通話)

33.冇嘢可以阻止你越嚟越好

34.你好有諗頭

35.好有創意喎

36.你好識諗，爸爸媽媽可以放心

37.我當初冇諗過你會做到

38.你揾到你要行嘅路

39.你終於大個啦

40.爸爸媽媽鄧你開心

41.辛苦得嚟有成果

42.你控制得很好

43.你好有自己一套，但係亦好成熟

44.你好上心

45.你懂得係適當嘅時候做適當嘅嘢

46.我睇到你嘅堅持

47.你講得好好，好得體

48.我好開心，我想聽你講多一次

49.你知唔知我好愛你

50.你可以話比你自己聽，你做到㗎

51.阿仔(女)，我對你有信心

52.我知你會諗到辦法

53.我知你唔會放棄

54.無論發生乜嘢事，爸爸媽媽都支持你

55.你係唔會孤單㗎

56.我地一家人嚟咖嘛

57.盡咗力已經係成功

58.唔係你所做嘅嘢，係你， 係你個人，系爸媽心目中永遠都係最好㗎

59.你不斷嘗試的精神，我比個「服」字你

60.爸爸媽媽係你個年紀都唔識(冇你咁叻)啊

以下是有基督信仰的十句:

61.你係主所喜悦架

62.主会係你身上做大事

63.爸爸媽媽唔知點樣幫你，但主總會有辦法

64.望住我，記住我呢個眼神，主呢刻都係咁望你

65.你做到嘅呢D，唔好嫌棄自己，係主眼中已經非常好

66.我地好開心，我相信主宜家都同樣咁開心

67.我感覺到天父宜家都笑緊啊

68.要記住啊，主同我地都好緊張你架，你係獨一無二架

69.爸爸媽媽冇可能無時無刻陪住你，但係主唔係啊

70.係主將你送左比我地

Written by Dr. Louis Kok, MD, PhD

郭廸舜博士

註册心理學家(美國)●

​

10 things you can say instead of "NO"

以前我哋細個…聽到最多一定是"NO" & 唔得…但是現在我們這一代要盡量去減少 NO 小朋友…

要阻止小朋友做不應該做的事…但又唔NO得…的確不是一件易事。

可以參考一下咁講啊!
多謝年妹同日媽媽谷的小分享! 有英文老師媽媽翻譯了廣東話版本呢!

1. 咁樣行唔通喎
2. 我唔容許你咁做
3. 點解咁做嘅? 講畀我聽
4. 我可以幫吓你喎
5. 咁樣做，做唔到喎
6. 一齊試下其他方法呀
7. 或者你可以試試呢個方法呀
8. 我想聽聽你嘅諗法
9. 合埋眼再諗清楚d
10. 我見到你好努力喎